নিয়মীয়া বাৰ্তা, ২৬ ডিচেম্বৰঃ মহানগৰীৰ খানামুখৰ পৰা জালুকবাৰীলৈ প্রস্তাৱিত পদপথসহ নলা নির্মাণৰ কাম বিগত এবছৰ ধৰি লেহেমীয়া গতিৰে নির্মাণ কৰি থকাৰ বাবে চৰম দুর্ভোগৰ সন্মুখীন হ’ব লগা হৈছে সাধাৰণ নাগৰিকসকল ৷ উল্লেখ্য যে ৰাষ্ট্রীয় ঘাইপথ প্রাধিকৰণে ঠিকাদাৰৰ হতুৱাই খানামুখৰ খানা নৈৰ দাঁতিৰ পৰা পদপথসহ নলা নির্মাণৰ কাম এবছৰ পূর্বে আৰম্ভ কৰে ৷ কিন্তু অতি লেহেমীয়া গতিৰে নির্মাণকার্য চলাই থকাৰ ফলত এক চতুর্থাংশ কামো সম্পূর্ণ হৈ উঠা নাই ৷ তদুপৰি নির্মাণ কৰা নলাসমূহৰ অধিকাংশই উন্মুক্ত হৈ থকা বাবে যিকোনো মুহূর্ততে ভয়াৱহ অঘটন সংঘটিত হোৱাৰ সম্ভাৱনাই দেখা দিছে ৷ কিয়নো ব্যৱসায় প্রতিষ্ঠান আৰু আৱাসিক এলেকাৰ কাষেৰে নির্মাণ কৰা নলাৰ ওপৰেৰে নাগৰিকসকল অহা–যোৱা কৰিব লাগে ৷ ফলত ঢ়াকনীবিহীন উন্মুক্ত নলাত পৰি যিকোনো অঘটন সংঘটিত হোৱাৰ সম্ভাৱনা নুই কৰিব নোৱাৰি ৷ তদুপৰি ওখকৈ নির্মাণ কৰা পদপথ তথা নলাসমূহৰ দুয়োদিশে মাটি পেলাই সমান নকৰা বাবে নাগৰিকসকলে যান–বাহন ওলোৱা–সোমোৱা কৰাৰ ক্ষেত্রত ভীষণ অসুবিধাৰ সন্মুখীন হ’ব লগা হৈছে ৷ নাগৰিকসকলে শীঘ্রে পদপথসহ নলাৰ নির্মাণ সম্পূর্ণ কৰাৰ লগতে নলাৰ দুয়োদিশে মাটি পেলাই যাতায়াত সুচল কৰি তুলিবলৈ ৰাষ্ট্রীয় ঘাইপথ প্রাধিকৰণক দাবী জনাইছে ৷