নিয়মীয়া বাৰ্তা, ৩১ অক্টোবৰ: মহানগৰীৰ গুৱাহাটী ক্লাবত কালি মাজনিশা চাৰিজনীয়া দুর্বৃত্তৰ দলে গুৱাহাটী বিশ্ববিদ্যালয়ৰ দুই ছাত্রক আক্রমণ কৰা ঘটনাক লৈ তীব্র চাঞ্চল্য সৃষ্টি হৈছে৷ প্রাপ্ত তথ্য অনুসৰি গুৱাহাটী ক্লাবৰ সমীপত শনিবাৰে মাজনিশা প্রায় ২.৩০ বজাত গুৱাহাটী বিশ্ববিদ্যালয়ত অধ্যয়নৰত কৃষ্ণানু শর্মা ফুকন আৰু তন্ময় হাজৰিকা নামৰ ছাত্র দুজনক কোনো কাৰণ নোহোৱাকৈ চাৰিজনীয়া দুর্বৃত্তৰ দলটোৱে আগুৰি ধৰি মাৰপিট কৰে৷ চাৰিজনীয়া দুর্বৃত্তৰ দলটোৱে দুই ছাত্রক মাৰপিট কৰাৰ উপৰি ডেগাৰ দেখুৱাই মৃত্যুৰ ভাবুকি দিয়ে৷ ঘটনা সন্দর্ভত ভুক্তভোগী দুই যুৱকে লতাশিল থানাত এজাহাৰ দাখিল কৰিছে৷ গুৱাহাটী বিশ্ববিদ্যালয়ত অধ্যয়নৰত দুই ছাত্রক আক্রমণ কৰা দুর্বৃত্তৰ দলটো অসম ছাত্র পৰিষদৰ সদস্য বুলি অভিযোগ উত্থাপন হৈছে৷ ইফালে লতাশিল আৰক্ষীয়ে এই ঘটনা সন্দর্ভত ৰহস্যজনক কাৰণত এতিয়ালৈকে তদন্ত আৰম্ভ কৰা নাই৷