নিয়মীয়া বার্তা, ৪ জুনঃ মহানগৰীৰ বেলতলাত বুধবাৰে দিন দুপৰতে চোৰে এখন বাইক লৈ উধাও হোৱা ঘটনাই চাঞ্চল্যৰ সৃষ্টি কৰে৷ বেলতলাৰ বশিষ্ঠপুৰত বুধবাৰে দিনৰ প্রায় ৩ বজাত সংঘটিত হয় এই চুৰি কাণ্ড৷ দুজন যুৱকে অঞ্চলটোৰ পৰা নীলা ৰঙৰ পালচাৰ বাইক এখন লৈ পলায়ন কৰে৷ ড০ ভবেন্দ্রনাথ শইকীয়া পথৰ পৰা দুই যুৱকে অতি কৌশলেৰে কম সময়ৰ ভিতৰতে বাইক লৈ পলায়ন কৰা সমগ্র দৃশ্য বন্দী হৈছে চিচি টিভিত৷
চুৰি হোৱা বাইকখনৰ নম্বৰ হ’ল এ এছ ডি বি ৮৭৪৮৷ হাতীগাঁও আৰক্ষীয়ে জনোৱা মতে বাইকখনৰ গৰাকী হ’ল মুছাদ্দিক হুছেইন৷ কিছু সময়ৰ কাৰণে বাইকখন সেই স্থানত ৰখাই বজাৰ কৰিবলৈ লোৱাৰ সময়তে চোৰে বাইকখন লৈ সেই স্থানৰ পৰা উধাও হয়৷ ইতিমধ্যে বাইকৰ গৰাকীয়ে হাতীগাঁও আৰক্ষী থানাত এই সন্দর্ভত এখন এজাহাৰ দাখিল কৰাত এটা গোচৰ ৰুজু কৰা হৈছে৷ আৰক্ষীয়ে বাইকখন চুৰি হোৱা স্থানত উপস্থিত হৈ চিচি টিভিৰ ফুটেজ সংগ্রহ কৰি তদন্ত অব্যাহত ৰাখিছে যদিও এই পর্যন্ত বাইকখনৰ লগতে চোৰৰ শুংসূত্র উলিয়াব পৰা নাই৷