নিয়মীয়া বার্তা, ২৯ ডিচেম্বৰঃ ৰে’ল বিভাগত চাকৰি দিয়াৰ প্রলোভনেৰে নিবনুৱা যুৱকৰ পৰা প্রৱঞ্চনাৰে ধন আত্মহত্যা কৰা এজন প্রৱঞ্চকক আজি সাতগাঁও আৰক্ষীয়ে গ্রেপ্তাৰ কৰে৷ ধৃত প্রৱঞ্চকটো পাঞ্জাবাৰীৰ নৱজ্যোতি নগৰৰ বাসিন্দা উত্তম দে’ (৩৯) বুলি জানিব পৰা গৈছে৷ আৰক্ষী সূত্রে জানিব পৰা মতে, ধৃত প্রৱঞ্চকটোৱে ২০১৮ চনৰ ছেপ্ঢেম্বৰ মাহত কোচবিহাৰৰ বৰশিমলু অঞ্চলৰ কেইবাগৰাকী নিবনুৱা যুৱকৰ পৰা প্রায় ৪১ লাখ টকা সংগ্রহ কৰে৷ নিজকে প্রাক্তন কেন্দ্রীয় ৰে’ল ৰাজ্যমন্ত্রী ৰাজেন গোহাঁইৰ ঘনিষ্ঠ বুলি পৰিচয় দি নিবনুৱাক ৰে’ল বিভাগত চাকৰি দিয়াৰ প্রলোভনেৰে ধন সংগ্রহ কৰে৷ কিন্তু এবছৰ উকলি যোৱাৰ পাছতো চাকৰি দিব নোৱাৰা বাবে ভুক্তভোগী আব্দুল আজিজে ঘটনা সন্দর্ভত সাতগাঁও থানাত এজাহাৰ দাখিল কৰাত আৰক্ষীয়ে ভাৰতীয় দণ্ডবিধিৰ ১২০ (বি) ৪১৯/৪২০/৪০৬ ধৰাত ৩৫৪/১৯ নম্বৰত এটা গোচৰ ৰুজু কৰি অভিযান চলাই আজি প্রৱঞ্চকটোক পাঞ্জাবাৰীৰ পৰা গ্রেপ্তাৰ কৰে৷ আৰক্ষীয়ে ঘটনা সন্দর্ভত তদন্ত অব্যাহত ৰাখিছে আৰু পৰৱর্তী সময়ত আৰু অধিক তথ্য পোহৰলৈ অহাৰ সম্ভাৱনা আছে৷ অৱশ্যে আব্দুল আজিজৰ পৰা তিনি লাখ আৰু বাকীখিনি ধন একেখন গাঁৱৰ আন কেইবাজনো যুৱকৰ পৰা সংগ্রহ কৰা বুলি জানিব পৰা গৈছে৷