নিয়মীয়া বাৰ্তা, ৪ ছেপ্টেম্বৰঃ অহা ৪ নবেম্বৰত চিত্ৰগৃহত মুক্তি পাব অমিত দীপক প্ৰডাকচনৰ বেনাৰত নিৰ্মীত নয়ন নীলিম অভিনীত বহু প্ৰত্যাশিত ছবি ‘বন্ধু’। অসমৰ চিনেমা ইতিহাসত আজি পোন প্ৰথম বাৰৰ বাবে মুক্তি পালে চিনেমাৰ প্ৰমচনেল গীত। বন্ধু চিনেমাখনৰ প্ৰচাৰৰ উদ্দেশ্যে আজি গুৱাহাটীৰ মেট্ৰিক্স চিত্ৰ গৃহত মুক্তি পালে এই গীতটো।
উল্লেখ্য যে কভিডৰ পূৰ্বেই চিত্ৰগ্ৰহণ সম্পূৰ্ণ কৰা চিনেমাখন পৰিস্থিতিত পৰি মুক্তি দিব পৰা হোৱা নাছিল। প্ৰায় দুটা বছৰৰ অপেক্ষাৰ অন্তত এইবাৰ মুক্তিৰ বাবে সাজু হ’ল বন্ধু। সততে অসমীয়া চিনেমাৰ প্ৰচাৰৰ দিশটোৰ দুৰ্বলতাৰ কথা চৰ্চাত থকাৰ সময়তে সম্পূৰ্ণ অগতানুগতিক প্ৰচেষ্টাৰে আজি মুক্তি পালে এই গীতটো। বিভিন্ন সামাজিক মাধ্যম যোগে মুক্তি পাইছে বন্ধু চিনেমাৰ শীৰ্ষক গীতটো লৈ নিৰ্মীত এই ভিডিঅ’ গীতটি । আজি চিত্ৰগৃহৰ বহল পৰ্দাত অসংখ্য দৰ্শকে চাই মোহিত হ’ল গীতটি। আনহাতে কিছুদিনৰ পাছতেই চিনেমাখনৰ পষ্টাৰ মুকলি কৰা হ’ব।