নিয়মীয়া বার্তা, ১৩ জুলাইঃ মহানগৰীৰ নিকটৱর্তী যোৰাবাটৰ ১২ মাইলৰ আমভেৰ গাঁৱত আজি পুৱতিনিশা প্রায় তিনি বজাত সংঘটিত হোৱা ভয়ংকৰ ভূমিস্খলনৰ ফলত দুজন লোকৰ থিতাতে মৃত্যু হয়৷ মৃত লোক দুজন মোহন ঘিমি আৰু বিলাস প্রধান৷ দুয়োজনৰে ঘৰ যোৰাবাটত বুলি জানিব পৰা গৈছে৷ মোন দাস নামৰ মহিলাগৰাকীৰ ঘৰত শুই থকা অৱস্থাতে নিশা প্রায় তিনি বজাত পাহাৰৰ মাটি খহি আহি গার্ড ৱালৰ লগতে ঘৰৰ দেৱাল ভাঙি হেঁচি ধৰে তিনিওজন যুৱকক৷ ফলত বিলাস প্রধান আৰু মোহন ঘিমি থিতাতে নিহত হয়৷
কথমপি ৰক্ষা পৰে মোন দাসৰ পুত্র অমন দাস৷ নিশা ধাৰাসাৰ বৰষুণৰ ফলতে এই ভূমিস্খলন হয়৷ পুৱা চাৰি বজাত যোৰাবাট আৰক্ষী আৰু এছডিআৰএফৰ লোক ঘটনাস্থলীত উপস্থিত হৈ মাটিত পোত গৈ থকা অৱস্থাত মৃত যুৱকদ্বয়ক উদ্ধাৰ কৰে৷ স্থানীয় লোকে জানিব দিয়া অনুসৰি, ঘৰটোৰ গৰাকী মোন দাস, পুত্র অমন দাস ঘৰটোত দুই–তিনি বছৰ ধৰি নথকাত পৰিত্যক্ত অৱস্থাত আছিল৷ কিন্তু কালি অমন দাস আৰু তেওঁৰে বন্ধুদ্বয় কিয় পৰিত্যক্ত ঘৰটোত নিশা আছিল জানিব পৰা হোৱা নাই৷