নিয়মীয়া বাৰ্তা, ১৭ এপ্রিলঃ ক’ৰোনা ভাইৰাছ সংক্রমণ ৰোধৰ বাবে ঘোষণা কৰা লকডাউনৰ মাজতে মহানগৰীৰ ভঙাগড় থানাৰ পৰা এখন ক্রেন চুৰি হয় ৷ আৰক্ষীৰ জিম্মাত থকা এএছ–৩০–৭৯৯৬ নম্বৰৰ ক্রেনখন দুর্বৃত্তই বুধবাৰে নিশা চুৰ কৰি গুৱাহাটীৰ পৰা বিশ্বনাথ চাৰিআলিত উপস্থিত হয় ৷ লকডাউনৰ সময়ছোৱাত আৰক্ষী আৰু নিৰাপত্তাৰক্ষীৰ নিৰাপত্তাৰ বেহু ফালি বিশ্বনাথ চাৰিআলিৰ নয়নজ্যোতি মেধি নামৰ গভাইত চোৰটোৱে গুৱাহাটীৰ পৰা ক্রেনখন প্রায় ২৫০ কিলোমিটাৰ দূৰত্ব অতিক্রম কৰি বিশ্বনাথত উপস্থিত হয় ৷ পাছত বিশ্বনাথ আৰক্ষীয়ে নিশা সোধা–পোছা কৰি গভাইত চোৰটোক গ্রেপ্তাৰ কৰাৰ লগতে ক্রেনখন উদ্ধাৰ কৰিবলৈ সক্ষম হয় ৷ বিশ্বনাথ আৰক্ষীয়ে ইতিমধ্যে ঘটনা সন্দর্ভত ভঙাগড় আৰক্ষীৰ লগত যোগাযোগ কৰিছে৷ ঘটনা সন্দর্ভত ভঙাগড় থানাত আৰক্ষীয়ে এটা গোচৰ ৰুজু কৰি আজি বিশ্বনাথ অভিমুখে ৰাওনা হয়৷ প্রাপ্ত খবৰ মতে, ধৃত চোৰটোৱে ক্রেনখন প্রথমতে কঁহৰালৈ লৈ যোৱাৰ পাছত বিশ্বনাথ অভিমুখে গৈ থকাৰ সময়তে আৰক্ষীৰ জালত পৰে ৷ আৰক্ষীয়ে থানাৰ চৌহদৰ পৰা দুর্বৃত্তই কেনেকৈ ক্রেনখন চুৰ কৰি নিশাৰ ভিতৰতে বিশ্বনাথ চাৰিআলিত উপস্থিত হ’বলৈ পালে সেয়া এক ৰহস্যৰ বিষয়৷ অৱশ্যে এই সন্দর্ভত মহানগৰ আৰক্ষীয়ে কোনো তথ্য সদৰী কৰা নাই৷ মন কৰিবলগীয়া কথা এই যে আৰক্ষীয়ে লকডাউনৰ সময়ছোৱাত যান–বাহন স্থানান্তৰ কৰাৰ বাবে ক্রেনখন ব্যৱহাৰ কৰা বুলি জানিব পৰা গৈছে ৷