শিলসাঁকোত খিলঞ্জীয়াক প্রত্যাহ্বান দখলকাৰীৰ

নিয়মীয়া বাৰ্তা, ২৮ জানুৱাৰীঃ গণৰাজ্য দিৱসৰ দিনাই সন্দেহযুক্ত লোকে গুৱাহাটীৰ পথৰকোৱাৰীৰ মেগজিনৰ শান্তিনগৰত শিলসাঁকো বিলৰ ভূমি বেদখলক কেন্দ্র কৰি তীব্র উত্তেজনাই বিৰাজ কৰে ৷ আৰক্ষী আৰু শিলসাঁকো সংৰক্ষণ সমিতিয়ে শিলসাঁকো বিলৰ পৰা সন্দেহযুক্ত বেদখলকাৰীক খেদি পঠিয়ায় ৷ ইপিনে ভি আই পি ৰোডৰ পৰা শিলসাঁকো বিললৈ অহা নলাটো এগৰাকী ব্যৱসায়ীয়ে নিশা পুতি পেলায় ৷ এই বিষয়ে জানিব পাৰি ৰাইজ উত্তেজিত হৈ পৰে ৷ উত্তেজিত জনতাই জেচিবি লগাই নলাটো খান্দি মুকলি কৰি দিয়ে ৷

উল্লেখ্য যে গুৱাহাটী উচ্চ ন্যায়ালয়ত ৰাজহুৱা স্বার্থজনিত গোচৰ বিচাৰাধীন হৈ থকা শিলসাঁকো বিলত দেওবাৰে একাংশ মহিলাৰ নেতৃত্বত এটা দুষ্টচক্রই ভূমি বেদখল কৰাত এক উত্তপ্ত পৰিস্থিতিৰ সৃষ্টি হৈছে ৷ উত্তেজিত জনতাই বেদখলকাৰীক শিলসাঁকো বিলৰ পৰা আঁতৰি যাবলৈ কোৱাত বেদখলকাৰীয়ে ৰাইজক আক্রমণ কৰিবলৈ উদ্যত হয় ৷ ইয়াকে লৈ দুইপক্ষৰ মাজত তীব্র উত্তেজনাই বিৰাজ কৰে ৷ ঘটনাস্থলীত আৰক্ষীৰ লোক উপস্থিত হৈ পৰিস্থিতি নিয়ন্ত্রণ কৰে ৷ উল্লেখ্য যে গুৱাহাটীৰ পাথৰকুঁৱেৰীৰ শিলসাঁকো বিলত দেওবাৰে পুৱাৰ ভাগত একাংশ মহিলাৰ নেতৃত্বত এটা দুষ্টচক্রই জলাশয়ৰ ভূমি বেদখল কৰি মাটি পুতি ঘৰ নির্মাণৰ প্রস্তুতি চলায় ৷ এই বিষয়ে স্থানীয় ৰাইজে জানিব পাৰি সমাজকর্মী ধর্ম ডেকাৰ নেতৃত্বত এটা দল ঘটনাস্থলীত উপস্থিত হৈ জলাশয়ৰ ভূমিত ঘৰ নির্মাণত বাধা আৰোপ কৰে ৷

ইয়াকে লৈ দুইপক্ষৰ মাজত তীব্র বাক–বিতণ্ডাৰ সৃষ্টি হয় ৷ ঘটনা সন্দর্ভত স্থানীয় ৰাইজে নুনমাটি আৰক্ষীক খবৰ দিয়ে৷ থানাৰ ভাৰপ্রাপ্ত বিষয়া ৰাজীৱ বৰুৱাৰ নেতৃত্বত এটা আৰক্ষীৰ দল ঘটনাস্থলীত উপস্থিত হৈ উত্তেজনাময় পৰিস্থিতি নিয়ন্ত্রণ কৰে ৷ তদুপৰি আৰক্ষী বিষয়া বৰুৱাই নির্মাণকার্য বন্ধ কৰিবলৈ নির্দেশ দিয়ে ৷ উক্ত নির্দেশৰ ভিত্তিত জলাশয়ত নির্মাণকার্য বন্ধ কৰিবলৈ বেদখলকাৰীয়ে বাধ্য হৈ পৰে ৷ ইপিনে জলাশয়ত ভূমি বেদখল কৰা দুষ্টচক্রটোক উচ্ছেদ কৰিবলৈ সমাজকর্মী ধর্ম ডেকাই কামৰূপ মহানগৰৰ উপায়ুক্ত বিশ্বজিত পেগুৰ ওচৰত দাবী জনায়৷ ইপিনে জলাশয়ৰ ভূমি বেদখল কৰা মহিলাসকলে জলাশয়ৰ ভূমি দলিলযোগে ক্রয় কৰা বুলি সংবাদ মাধ্যমক জানিবলৈ দিয়ে ৷ এই ঘটনাৰ পিছতে পাথৰকোৱেৰীৰ ৰাইজে ধর্ম ডেকাক সভাপতি হিচাপে লৈ শিলসাঁকো সংৰক্ষণ উন্নয়ন সমিতি গঠন কৰি দিছে৷ সভাৰ প্রস্তাৱমর্মে উক্ত জলাশয়ৰ ভূমি সংৰক্ষণ কৰিবলৈ সমিতিয়ে কামৰূপ মহানগৰ জিলা উপযুক্তক এখন স্মাৰক–পত্র প্রদান কৰিছিল ৷