নিয়মীয়া বাৰ্তা, ২৮ ফেব্ৰুৱাৰীঃ মহানগৰীৰ ভঙাগড়স্থিত শ্বপিং মল বিগ বজাৰসহ বিভিন্ন প্রান্তত থকা আন ৭টাকৈ শ্বপিং মল হঠাৎ বন্ধ কৰি দিয়া হৈছে৷ শনিবাৰে ফিউচাৰ ৰিটেইল কোম্পানীয়ে শ্বপিং মলকেইটা হঠাৎ বন্ধ কৰি দিয়াক লৈ উত্তপ্ত পৰিস্থিতিৰ সৃষ্টি হয়৷
উল্লেখ্য যে বিগ বজাৰকে ধৰি চিৰিয়াখানাৰ সমীপত থকা গুৱাহাটী চেণ্ট্ৰেল লাচিত নগৰস্থিত ব্রেণ্ড ফেক্টৰী আৰু লখৰাৰ বিগ বজাৰৰ লগতে বিভিন্ন স্থানৰ ৭টাকৈ প্রতিষ্ঠান কালি ৰহস্যজনকভাৱে ৰিটেইল কোম্পানীয়ে হঠাৎ বন্ধ কৰি দিয়ে৷ নিশাৰ ভাগত শ্বপিং মলত কর্মৰত কর্মচাৰীসকলক উলিয়াই দি শ্বপিং মলত তলা ওলমাই দিয়ে৷ দেওবাৰে পুৱাৰ ভাগত কর্মচাৰীসকলে নিজ নিজ কর্মস্থলীলৈ যায় যদিও ভিতৰত প্রৱেশ কৰিব নোৱাৰি উভতি আহিবলগীয়া হয়৷
মন কৰিবলগীয়া কথা এই যে উক্ত শ্বপিং মলকেইটাত সহস্রাধিক যুৱক–যুৱতী কর্মৰত আছিল৷ অর্থাৎ ৰিটেইল কোম্পানীয়ে প্রতিষ্ঠানকেইটা বন্ধ কৰি দিয়াত শ শ থলুৱা কর্মচাৰী কর্মসংস্থাপনহীন হৈ পৰে৷ কিন্তু কি কাৰণে ৰিটেইল কোম্পানীসমূহে উক্ত প্রতিষ্ঠানসমূহ বন্ধ কৰিলে, সেই তথ্য পোহৰলৈ অহা নাই৷