নিয়মীয়া বাৰ্তা ১১ ছেপ্টেম্বৰঃ মহানগৰীৰ গড়চুকৰ গড়ভঙাৰ পৰা অলপতে দুগৰাকী ব্যৱসায়ীক অপহৰণ কৰা ঘটনাৰ মাষ্টাৰ মাইণ্ড ৰামেশ্বৰ ৰাভা আৰক্ষীৰ জালত পৰিছে৷ গড়চুক আৰক্ষীয়ে অপহৰণকাৰী ৰাভাক গোৱালপাৰাৰ পৰা কৃষ্ণাই আৰক্ষীৰ সহযোগত গ্রেপ্তাৰ কৰে৷ এডিচিপি শুভাশিস বৰুৱাৰ নেতৃত্বত এটা সঁজাতী দলে অভিযান চলাই ঘটনাৰ মূল নায়ক ৰাভাৰ লগতে এই অপহৰণ কাণ্ডৰে জড়িত থকা আন ৯জন অভিযুক্তক গ্রেপ্তাৰ কৰিবলৈ সক্ষম হয়৷
ধৃত অপহৰণকাৰীকেইটা হ’ল– আমিনুল হক, মইনুল হক, ভদ্রেশ্বৰ টিমুং, কমলা ৰংপী, ৰাজু ৰংপী, অমল বে’, লোহাৰ ৰংপী আৰু কিৰণ ৰাভা৷ এই ঘটনাৰ সৈতে জড়িত থকাৰ অভিযোগত আৰক্ষীয়ে মাজিদা খাতুন নামৰ এগৰাকী মহিলাকো গ্রেপ্তাৰ কৰে৷
উল্লেখ্য যে যোৱা ৩০ জুনত গড়ভঙাৰ দুর্গম এলেকাৰ পৰা জাপৰিগোগৰ ব্যৱসায়ী জয়ন্ত কছাৰী আৰু কুশল কলিতাক দুর্বৃত্তই অপহৰণ কৰি লক্ষাধিক টকা দাবী কৰিছিল৷ ঘটনা সন্দর্ভত গড়চুক থানাত ৰুজু হোৱা গোচৰৰ ভিত্তিত অভিযান চলাই পূর্বে আন কেইবাটাও অপহৰণকাৰীক গ্রেপ্তাৰ কৰিছিল৷