নিয়মীয়া বাৰ্তা ৯ ফেব্ৰুৱাৰীঃ মহানগৰীৰ পাণবজাৰস্থিত গুৱাহাটী পৌৰ নিগমৰ কার্যালয়ত সোমবাৰে পুৱা এক ভয়ংকৰ অগ্নিকাণ্ড সংঘটিত হয়৷ এই অগ্নিকাণ্ডত পৌৰ আয়ুক্তৰ ব্যক্তিগত সহায়কৰ কার্যালয়ত বিস্তৰ ক্ষয়–ক্ষতি হয়৷
প্রাপ্ত খবৰ মতে কালি পুৱা প্রায় ৭.৩০ বজাত পৌৰ আয়ুক্তৰ কার্যালয়ত বৈদ্যুতিক শ্বর্ট চার্কিটৰ ফলত অগ্নিকাণ্ডৰ সূত্রপাত ঘটে৷ নিমিষতে ক’লা ধোঁৱাই পৌৰ আয়ুক্তৰ কার্যালয় ছানি ধৰাত এক হুৱাদুৱা পৰিস্থিতিৰ সৃষ্টি হয়৷ পিছত পৌৰ আয়ুক্তৰ কার্যালয়ৰ কর্মচাৰী আৰু আৰক্ষী আয়ুক্তৰ সহযোগত জুই নুমাবলৈ সক্ষম হয়৷ এই অগ্ণিকাণ্ডত পৌৰ আয়ুক্তৰ ব্যক্তিগত সহায়কৰ কোঠাৰ চিলিং আৰু বিদ্যুতৰ তাঁৰ আদি জ্বলাৰ লগতে আচবাব–পত্রৰ ক্ষয়–ক্ষতি হয়৷ অৱশ্যে আৰক্ষী আৰু কার্যালয়ৰ কর্মচাৰীৰ তৎপৰতাত ভয়ংকৰ অঘটনৰ পৰা পৌৰ আয়ুক্তৰ কার্যালয়টো ৰক্ষা পৰে৷