নিয়মীয়া বাৰ্তা ১৭ আগষ্টঃ প্রতি শনি আৰু দেওবাৰে ৰাজ্যৰ লগতে মহানগৰীতো প্রযোজ্য হৈ আছে সাপ্তাহিক লকডাউন৷ ইয়াৰ মাজতে সাপ্তাহিক লকডাউন উলংঘা হ’ল খোদ ৰাজধানী মহানগৰীত৷ চৰকাৰৰ সকলো নীতি– নির্দেশনাক জলাঞ্জলি দি বেলতলা তিনিআলি, ছার্ভে, জয়ানগৰত বহিল মাছ–মাংস আৰু পাচলিৰ বজাৰ৷ প্রশাসনৰ নির্লিপ্ততাৰ পূর্ণ সুযোগ গ্রহণ কৰি বেলতলাৰ ভিন্ন প্রান্তত একাংশ ব্যৱসায়ীয়ে পাতিলে বজাৰ৷ ইফালে, বজাৰ বহাৰ লগে লগে একাংশ গ্রাহকো উবুৰি খাই পৰিল মাছ–মাংসৰবজাৰত৷ সামাজিক দূৰত্বক ভেঙুচালি কৰি গাতে গা লগাই বজাৰ কৰাত ব্যস্ত হৈ পৰিল বহু লোক৷ আন একাংশই আকৌ মাস্ক পৰিধান নকৰাকৈয়ে মেলা সদৃশ বজাৰত কৰিলে চফৰ৷ ক’ৰোনা মহামাৰী নিমন্ত্রণ জনাবলৈহে যেন একাংশই কৰিলে ল’ৰা–ধেমালি৷ অৱশেষত দিছপুৰ থানাৰ আৰক্ষী উপস্থিত হৈ সাপ্তাহিক লকডাউন ভংগ কৰি বহা বজাৰ বন্ধ কৰি একাংশ ব্যৱসায়ীক জবাবদিহি কৰাৰ লগতে আন একাংশ গ্রাহককো সকীয়নি প্রদান কৰে৷