নিয়মীয়া বার্তা, ২৮ জুনঃ সমগ্র ৰাজ্যজুৰি ক’ৰোনা ভাইৰাছৰ আতংকৰ মাজতেই বানে ভয়ংকৰ ৰূপ ধাৰণ কৰিছে৷ যোৱা কেইবাদিনো ধৰি হোৱা নেৰানেপেৰা বৰষুণৰ ফলত ব্রহ্মপুত্রকে ধৰি ইয়াৰ উপনৈসমূহ ফেনে–ফোটোকাৰে ওফন্দি উঠিছে৷ ব্রহ্মপুত্রৰ বাঢ়নী পানীয়ে ৰাজ্যৰ বিভিন্ন প্রান্তৰ শ শ কৃষিভূমি প্লাৱিত কৰা পৰিলক্ষিত হৈছে৷ ইয়াৰ সমান্তৰালকৈ গুৱাহাটী মহানগৰীৰ ব্রহ্মপুত্রৰ পানী বিপদ সীমাৰ ১৩ চেণ্টিমিটাৰ ওপৰেৰে বৈ আছে৷
কামৰূপ মহানগৰ জিলা প্রশাসনৰ তৰফৰ পৰা ইতিমধ্যে ভৰলুমুখ, ফাঁচীবজাৰ, নুনমাটি, চূণচালিৰ লগতে ব্রহ্মপুত্রৰ দাঁতিকাষৰীয়া অঞ্চলত বসবাস কৰা লোকসকললৈ সতর্কবাণী প্রেৰণ কৰিছে৷ যিকোনো মুহূর্তত ব্রহ্মপুত্রৰ বাঢ়নী পানীয়ে ভয়ংকৰ ৰূপ ধাৰণ কৰাৰ আশংকাত ব্রহ্মপুত্রৰ দাঁতিকাষৰীয়া অঞ্চলত বসবাস কৰা লোকসকল শংকিত হৈ পৰিছে৷ ইপিনে, মহানগৰীৰ ভৰলু নৈ ওফন্দি উঠাৰ ফলত ভৰলুৰ দুয়োকাষে বসবাস কৰা লোকসকল আতংকিত হৈ পৰিছে৷ যিকোনো সময়ত ভৰলুৰ পানী মহানগৰীত প্রৱেশ কৰাৰ সম্ভাৱনাই দেখা দিছে৷
ব্রহ্মপুত্রৰ বাঢ়নী পানীয়ে ভয়ংকৰ ৰূপ ধাৰণ কৰাৰ পিছতেই কামৰূপ মহানগৰ জিলা উপায়ুক্তই ৰাইজলৈ সতর্কবাণী প্রেৰণ কৰাৰ উপৰি গুৱাহাটী–উত্তৰ গুৱাহাটীৰ ফেৰী সেৱা আৰু ব্রহ্মপুত্রত নাও চলাচল অহা ৩০ জুনলৈকে বন্ধ ৰাখিছে৷ অৱশ্যে পৰৱর্তী নির্দেশনা জাৰি নকৰালৈকে আভ্যন্তৰীণ জল পৰিবহণ বিভাগে প্রশাসনৰ নির্দেশনা অনুসৰি ব্রহ্মপুত্রত নাও চলাচল সম্পূর্ণৰূপে বন্ধ কৰি দিছে৷ লাচিতঘাট, মহাবীৰ উদ্যান, শংকৰদেৱ উদ্যানকে ধৰি ফাঁচীবজাৰ অঞ্চলত যিকোনো মুহূর্তত ব্রহ্মপুত্রৰ পানী সোমোৱাৰ সম্ভাৱনাই দেখা দিছে৷
সেয়েহে জিলা প্রশাসনে ব্রহ্মপুত্রৰ দাঁতিকাষৰীয়া লোকসকলক সতর্ক হৈ থাকিবলৈ আহ্বান জনাইছে৷ ফেনে–ফোটোকাৰে ওফন্দি উঠা লুইতৰ বাঢ়নী পানীয়ে যাতে কোনো অঘটন সংঘটিত নকৰে তাৰ বাবে মহানগৰ জিলা প্রশাসন, দুর্যোগ প্রশমন বিভাগ আৰু নদী আৰক্ষী সম্পূর্ণ সষ্টম হৈ আছে৷ সাম্ভাব্য যিকোনো পৰিস্থিতিৰে মোকাবিলা কৰিবলৈ নদী আৰক্ষী আৰু দুর্যোগ প্রশমনে যাৱতীয় ব্যৱস্থা গ্রহণ কৰিছে৷