নিয়মীয়া বাৰ্তা ১৩ ডিচেম্বৰঃ গীতানগৰ, নাৰেংগী অঞ্চলৰ পাঁচ শতাধিক মহিলা কর্মকর্তাই লিবাৰেল ডেম’ক্রেটিক পার্টীৰ সহযোগত অঞ্চলটোত চলি থকা অবৈধ সুৰাৰ প্রচলন আৰু প্রশাসনৰ নির্লিপ্ত ভূমিকাৰ বিৰুদ্ধে এক প্রতিবাদী সমদল উলিয়ায়৷ প্রতিবাদী সমদলত অংশ লোৱা মহিলাসকলে অভিযোগ কৰা অনুসৰি নাৰেংগী অঞ্চলত বহুতো পৰিয়াল এতিয়া অবৈধ সুৰা আৰু বিক্রী কার্যত জড়িত হৈ পৰিছে৷ অবৈধ সুৰা এনেকৈ সহজলভ্য হোৱাৰ বাবে অঞ্চলটোৰ বহু পুৰুষ তথা যুৱক সুৰাসক্ত হৈছে৷ ফলত সেই অঞ্চলৰ মহিলাসকলে ঘৰুৱা অশান্তি আৰু হিংসাৰ সন্মুখীন হৈছে৷ একেদৰে যুৱপ্রজন্মই সুৰাপান কৰি নিচাসক্ত হৈ নিজৰ শিক্ষা আৰু ভৱিষ্যৎ ধ্বংস কৰা পৰিলক্ষিত হৈছে৷ এল ডি পিৰ নুনমাটি মণ্ডলৰ সভানেত্রী সৰোজা সিন্হাই অবৈধ সুৰা ব্যৱসায় নিয়ন্ত্রণৰ ক্ষেত্রত চৰকাৰে লোৱা নির্লিপ্ত ভূমিকাৰ সমালোচনা কৰি কয় যে অবৈধ মদৰ ব্যৱসায় অসমৰ ঘৰে ঘৰে এনেভাৱে বিয়পি পৰিছে যে ইতিমধ্যেই ই এক সামাজিক ব্যাধিৰ ৰূপ লৈছে৷ অনুষ্ঠানত জিলা সভানেত্রী দীপালী শইকীয়া, ৱার্ড সভানেত্রী উজলা ঠাকুৰীয়াই যদিহে প্রশাসনে এই বিষয়ত অনতি পলমে বিহিত ব্যৱস্থা গ্রহণ নকৰে তেন্তে নুনমাটি থানা ঘেৰাও কৰাৰ হুংকাৰ দিয়ে৷