নিয়মীয়া বাৰ্তা ৮ ছেপ্টেম্বৰঃ ভাৰতীয় সেনাৰ তৃতীয় পদমর্যাদাৰ অতি সন্মানীয় পদবী মেজৰ জেনেৰেল পদত সেনাৰ মুখ্য কার্যালয় ‘সেনা ভৱন’ত কার্যনির্বাহ কৰি থকা ভাস্কৰ কলিতাক প্রতিৰক্ষা মন্ত্রালয়ে ৰাষ্ট্রীয় শিক্ষার্থী বাহিনী চমুকৈ এন চি চিৰ উত্তৰ পূব মণ্ডলৰ অতিৰিক্ত সঞ্চালকপ্রধান (এ ডি জি) হিচাপে নিযুক্তি দিছে৷ কালি নৱনিযুক্ত এ ডি জি মেজৰ জেনেৰেল ভাস্কৰ কলিতাই মেঘালয়ৰ শ্বিলঙত থকা এন চি চিৰ উত্তৰ–পূব মণ্ডলৰ মুখ্য কার্যালয়ত কার্যভাৰ গ্রহণ কৰে৷ কার্যভাৰ গ্রহণৰ পিছতেই জেনেৰেল কলিতাক কার্যালয়ৰ সেনা বিষয়া, প্রশিক্ষক আৰু আন কর্মচাৰীসকলে আদৰণি জনায়৷
উল্লেখ্য যে ইয়াৰ পূর্বে আন এজন অসম সন্তান মেজৰ জেনেৰেল অনন্ত ভূঞাই এ ডি জি পদত কার্যনির্বাহ কৰি যোৱা ৩১ জুলাইত অৱসৰ গ্রহণ কৰিছিল৷ জেনেৰেল ভূঞাৰ পিছত এই পদত নিযুক্তি পোৱা ভাস্কৰ কলিতা হৈছে দ্বিতীয়জন অসমীয়া৷