নিয়মীয়া বাৰ্তা, ১৪ নবেম্বৰঃ ৰাজ্যত সংঘটিত হোৱা লাখ লাখ টকাৰ সংখ্যালঘু ছাত্র বৃত্তিৰ ধনৰ কেলেংকাৰিত সাঙোৰ খাই পৰিছে গুৱাহাটী মহানগৰীৰ এখন বিদ্যালয়৷ দিছপুৰ শিক্ষাখণ্ডৰ অন্তর্গত কাহিলিপাৰাৰ দক্ষিণগাঁও হাইস্কুলত ছাত্র বৃত্তিৰ নামত সংখ্যালঘু ছাত্র–ছাত্রীৰ পৰা বিদ্যালয়খনৰ প্রধান শিক্ষকে ধন সংগ্রহ কৰাৰ গুৰুতৰ অভিযোগ উত্থাপন হৈছে৷
প্রাপ্ত অভিযোগ অনুসৰি, বিদ্যালয়খনৰ প্রধান শিক্ষক হেলাল উদ্দিনে একাংশ সংখ্যালঘু পৰিয়ালৰ শিক্ষার্থীৰ পৰা ছাত্র বৃত্তিৰ অনলাইন আবেদনৰ নামত ৩০০ৰ পৰা ৫০০ টকা পর্যন্ত সংগ্রহ কৰিছে৷ আনকি অভিযোগ সন্দর্ভত সংবাদ মাধ্যমৰ আগত অকপটে স্বীকাৰ কৰি ইয়াৰ এটা অংশ বিভাগীয় বিষয়াৰ জেপলৈও যোৱাবুলি প্রধান শিক্ষককগৰাকীয়ে সদৰী কৰিছে৷ প্রধান শিক্ষকগৰাকীয়ে কয় যে বিদ্যালয়খনত অধ্যয়নৰত বহু শিক্ষার্থী অথবা তেওঁলোকৰ অভিভাৱকে অনলাইন আবেদনৰ বিষয়ে অপাৰগ৷ সেয়েহে ছাত্র–ছাত্রীৰ পৰী দুই–তিনিশ টকা খৰচ বাবদ সংগ্রহ কৰাবুলি প্রধান শিক্ষকগৰাকীয়ে জানিবলৈ দিছে৷
তদুপৰি, উপৰিউক্ত বিষয়া–কর্মচাৰীসক কেতিয়াবা খৰচ বাবদ সামান্য ধন বিচৰা বুলি তেওঁ সংবাদ মাধ্যমৰ আগতব্যক্ত কৰিছে৷ অৱশ্যে বিষয়টোক লৈ বিভিন্ন প্রশ্নৰ অৱতাৰণা হোৱাত প্রধান শিক্ষক হেলালে ইতিমধ্যে সংগ্রহ কৰা ছাত্র–ছাত্রীসকলৰ ধন ওভতাই দিয়াৰ সিদ্ধান্ত লোৱা বুলি উল্লেখ কৰে৷
ইপিনে, প্রধান শিক্ষকক প্রদান কৰা ধন ওভতাই আনিবলৈ আজি বিদ্যালয় চৌহদত বহু শিক্ষার্থী আৰু তেওঁলোকৰ অভিভাৱকে পুৱাৰে পৰা ভিৰ কৰা পৰিলক্ষিত হয়৷ বিদ্যালয়ত শিক্ষার্থী আৰু তেওঁলোকৰ অভিভাৱক উপস্থিত হয় যদিও ৰহস্যজনকভাৱে প্রধান শিক্ষকগৰাকীয়ে তেওঁলোকক সাক্ষাৎ কৰাৰ পৰা বিৰত থাকে৷ আনহাতে, এই সন্দর্ভত সংখ্যালঘু উন্নয়ন ব’ডৰ অধ্যক্ষ মমিনুল আৱালে আশ্চর্য প্রকাশ কৰি বিষয়টোৰ উচিত তদন্তৰ পোষকতা কৰিছে৷