নিয়মীয়া বাৰ্তা ২৮ নৱেম্বৰঃ অসম চৰকাৰৰ পৰিবহণ বিভাগে কিছুদিন পূর্বে দিয়া এক নির্দেশৰ ভিত্তিত কামৰূপ মহানগৰ জিলাৰ পৰিবহণ বিষয়া হিচাপে আজি গৌতম দাস (পঞ্জীয়ন আৰু অনুজ্ঞা, প্রৱর্তক, অধ্যক্ষ, চালক আৰু পৰিচালক প্রশিক্ষণ বিদ্যালয়) আৰু ৰফিকুল ইছলামে (সচিব, আঞ্চলিক পৰিবহণ প্রাধিকৰণ) কার্যভাৰ গ্রহণ কৰে৷ গৌতম দাসে বিদায়ী জিলা পৰিবহণ বিষয়াৰ দায়িত্বত থকা সহকাৰী পৰিবহণ আয়ুক্ত গুণধৰ দাস আৰু ৰফিকুল ইছলামে বাপন কলিতাৰ পৰা কার্যভাৰ গ্রহণ কৰে৷ ইয়াৰ পূর্বে গৌতম দাস কামৰূপ জিলাৰ পৰিবহণ বিষয়াৰ দায়িত্বত আছিল৷ তেনেদৰে ৰফিকুল ইছলাম কামৰূপ মহানগৰ জিলাৰ (পঞ্জীয়ন আৰু অনুজ্ঞা) জ্যেষ্ঠ যান–বাহন পৰিদর্শকৰ দায়িত্বত আছিল আৰু জিলা পৰিবহণ বিষয়ালৈ পদোন্নতিসহ বদলিৰ নির্দেশ দিয়া হৈছিল৷ আনহাতে, কার্যভাৰ গ্রহণৰ পিছতে দুয়োজন জিলা পৰিবহণ বিষয়াক যান–বাহন পৰিদর্শক, প্রৱর্তক পৰিদর্শক, সহঃ প্রৱর্তক পৰিদর্শক আৰু আন কর্মচাৰীসকলে আদৰণি জনায়৷