নিয়মীয়া বাৰ্তা ১০ নৱেম্বৰঃ উত্তৰ–পূব সীমান্ত ৰে’ল কর্তৃপক্ষৰ অধীনৰ ৰে’ল আৱাসসমূহ অধিকাংশ আৱাসীয়ে ভাৰালৈ দি অবৈধভাৱে ধন উপার্জন কৰি থকাৰ গুৰুতৰ অভিযোগ উঠিছে৷ জানিব পৰা মতে, পাণ্ডু–মালিগাঁও অঞ্চলত ৰে’ল বিভাগৰ প্রায় ২২শ আৱাস আছে৷ আৱাসসমূহ বিভিন্ন বর্গৰ ৰে’ল কর্মচাৰীৰ নামত আবণ্টন দিয়া আছে৷ কিন্তু অভিযোগ অনুসৰি অধিকাংশ আৱাসত নিজে থকাৰ সলনি ভাৰালৈ দি অবৈধ বেহা চলাই আছে৷
জানিব পৰা মতে, আৱাসৰ নামত কর্মচাৰীজনৰ পৰা ৰে’ল বিভাগে মাহত আঠশৰ পৰা এহেজাৰ টকা আদায় লয়৷ কিন্তু আৱাসটো ভাৰালৈ দিলে কর্মচাৰীজনে মাহেকত দহৰ পৰা পোন্ধৰ হাজাৰ টকা লাভ কৰে৷ ফলত অধিকাংশ কর্মচাৰীৰে আৱাস ভাৰালৈ দিয়াৰ প্রৱণতা গঢ়ি উঠিছে৷ তদুপৰি, বহু কর্মচাৰীয়ে আৱাসৰ সন্মুখৰ মুকলি অংশত তর্জা বা টিনৰ চালি সাজিও ভাৰালৈ দিয়া পৰিলক্ষিত হৈছে৷
ৰে’ল বিভাগৰ নিয়ম অনুসৰি আৱাস চৌহদত নিজাকৈ কোনো নির্মাণকার্য কৰিব নোৱাৰে৷ আনকি সাধাৰণ কিবা মেৰামতি কৰিব লগা হ’লেও ৰে’ল বিভাগৰ সংশ্লিষ্ট কর্তৃপক্ষৰ অনুমতিৰ প্রয়োজন৷ ইয়াৰ পিছতো গৰিষ্ঠসংখ্যক আৱাসৰ সন্মুখত টিনৰ চালি, তর্জাৰ ঘৰ দেখিবলৈ পোৱা যায়৷ মন কৰিবলগীয়া যে মালিগাঁৱতে আছে উত্তৰ–পূব সীমান্ত ৰে’লৱেৰ মুখ্য কার্যালয়৷ ইয়াৰ পিছতো পাণ্ডু, মালিগাঁও অঞ্চলত আৱাসৰ নামত অবৈধ বেহা চলি থকা কার্যই বিভাগীয় কর্তৃপক্ষৰ দায়িত্বহীনতা উদঙাই দিছে৷ এইখিনিতে উল্লেখ কৰা ভাল যে পাণ্ডু, মালিগাঁৱত বিগত সময়ছোৱাত অভাৱনীয় হাৰত বৃদ্ধি পাইছে মদ, ভাং, ড্রাগ্ছ, জুৱাকে ধৰি বিভিন্ন অসামাজিক কার্যকলাপ৷ বৃদ্ধি পাই আহিছে চুৰি–ডকাইতিৰ ঘটনা৷ ড্রাগ্ছ আৰু জুৱাকেন্দ্রিক সংঘাতৰ বাবে কিছুদিন পূর্বে পাণ্ডু অঞ্চলত সংঘটিত হৈছে দুটাকৈ লোমহর্ষক হত্যাকাণ্ড৷
ৰে’লৱেৰ আৱাসসমূহ নিৰাপদ আশ্রয়স্থল হিচাপে বিবেচিত হোৱাৰ পৰিপ্রেক্ষিতত চতুৰ অপৰাধীসকলে আৱাসত ভাৰাতীয়া হিচাপে আশ্রয় লৈ থকাৰ সম্ভাৱনীয়তাক নুই কৰিব নোৱাৰি৷ যদি উত্তৰ–পূব সীমান্ত ৰে’ল কর্তৃপক্ষই আৱাসসমূহত চৰজমিন অনুসন্ধান চলায়, তেন্তে আৱাস আবণ্টনৰ নামত চলি থকা অবৈধ বেহা পোহৰলৈ আহিব৷