নিয়মীয়া বাৰ্তা, ১ নৱেম্বৰঃ ৰাণী বনাঞ্চলৰ অধীনৰ আৰু দীপৰবিলৰ পৰা কিছু নিলগৰ চকৰদৌ পাহাৰত কালি দুপৰীয়া এটা মৃত অৱস্থাত হাতী পোৱালি উদ্ধাৰ হয়৷ ৰাণী বনাঞ্চলৰ আঞ্চলিক বন বিষয়া মনোৰঞ্জন বর্মনে জানিবলৈ দিয়া মতে দীপৰ বিলৰ ভাঙাৰা গোহাঁই থানৰ পৰা প্রায় ১০০ মিটাৰ নিলগত থকা চকৰদৌ পাহাৰত কোনো খৰি লুৰিবলৈ যোৱা লোকে মৃত অৱস্থাত হাতী পোৱালিটো প্রত্যক্ষ কৰে৷
তাৰ পাছত বন বিভাগক অৱগত কৰাত বনকর্মীৰ দল গৈ প্রায় তিনি বছৰ বয়সৰ মাইকী হাতী পোৱালিটো উদ্ধাৰ কৰে৷ আনহাতে চকৰদৌ পশু উপ–স্বাস্থ্য কেন্দ্রৰ পশু চিকিৎসক ডাঃ নাৰায়ণ দেউৰীয়ে জনাই যে হাতীটোৰ মৰণোত্তৰ পৰীক্ষা সম্পন্ন কৰাৰ পাছত হাতীটো গাঁত খান্দি বিভাগীয় নিয়মানুসৰে পুতি থোৱা হয়৷ পশু চিকিৎসকে হাতীটো কিবা অচিন ৰোগত আক্রান্ত হৈ কেইবাদিনো আগতে মৃত্যু হোৱা বুলি সন্দেহ প্রকাশ কৰিছে৷