নিয়মীয়া বাৰ্তা, ২৪ আগষ্ট: সাতগাঁৱৰ পৰা শনিবাৰে পুৱা ৰহস্যজনকভাৱে অপহূত হোৱা দীনদয়াল সিং নামৰ যুৱকজনক আৰক্ষীয়ে উদ্ধাৰ কৰিবলৈ সক্ষম হয়৷ সাতগাঁৱৰ ন–পাৰাৰ বাসিন্দা দীনদয়াল সিং শনিবাৰে পুৱা ৬ বজাত ঘৰৰ পৰা ওলাই অহাৰ পিছৰে পৰা সন্ধানহীন হৈ আছিল৷
অপহূত দীনদয়ালে জানিবলৈ দিয়া মতে এখন বগা ৰঙৰ এল্ট’ গাড়ীত অহা ৪জন যুৱকে তেওঁক অপহৰণ কৰিছিল৷ সাতগাঁও শনি মন্দিৰৰ সমীপত ঠিকনা বিচৰাৰ ছলেৰে যুৱককেইজনে দীনদয়ালক অচেতন কৰি অপহৰণ কৰিছিল৷ কালি দীনদয়ালক কোকৰাঝাৰৰ বগৰীবাৰী থানাৰ সমীপত অচেতন অৱস্থাত আৰক্ষীয়ে উদ্ধাৰ কৰে৷ প্রাথমিক চিকিৎসাৰ অন্তত দীনদয়াল সুস্থ হোৱাত বগৰীবাৰী আৰক্ষীয়ে দিছপুৰ আৰক্ষীক দীনদয়ালক গতাই দিয়ে৷ অপহৰণকাৰীয়ে দীনদয়ালক বাংলাদেশলৈ পঠিয়াব বুলি কোৱাৰ লগতে গাড়ীৰ ভিতৰতে দুটা দিন ৰাখিছিল৷ ইফালে, অপহৰণকাৰীয়ে দীনদয়ালৰ পৰিয়ালক মুক্তিপণ দাবী নকৰাত এই অপহৰণ কাণ্ডক লৈ ৰহস্যৰ সৃষ্টি হৈছে৷