নিয়মীয়া বাৰ্তা, ১৮ আগষ্টঃ কটন বিশ্ববিদ্যালয়ে স্নাতক শাখাত নামভৰ্তিৰ বাবে মঙলবাৰে পৰিপত্ৰ প্ৰকাশ কৰিছে। যোগ্যতাৰ ভিত্তিত অনুষ্ঠিত হ’বলগীয়া নামভৰ্তি প্ৰক্ৰিয়াৰ বাবে শিক্ষার্থীয়ে প্ৰৱেশ পৰীক্ষাত অৱতীর্ণ হ’ব লাগিব।
কটন আণ্ডাৰ গ্ৰেজুৱেট এনণ্ট্ৰেন্স পৰীক্ষাত ( চি ইউ জি ই ই ২০২১) শিক্ষাৰ্থীয়ে অৱতীর্ণ হৈ লাভ কৰা নম্বৰৰ সৈতে হায়াৰ ছেকেণ্ডাৰী পৰীক্ষাত লাভ কৰা মুঠ নম্বৰৰ ৪০ শতাংশ নম্বৰ যোগ কৰা হ’ব। সৰ্বমুঠ নম্বৰৰ ভিত্তিত মেধাৰ তালিকা প্ৰস্তুত কৰা হ’ব। নামভৰ্তিৰ আবেদনৰ বাবে ২১ আগষ্টৰ পৰা অনলাইন প-পত্ৰ মুকলি কৰাৰ সম্ভাৱনাৰ কথা উল্লেখ কৰে।
শিক্ষাৰ্থীসকলে বিশ্ববিদ্যালয়ৰ অফিচিয়েল ৱেবছাইট www.cottonuniversity.ac.in ত সবিশেষ তথ্য জানিব পাৰিব বুলি বিশ্ববিদ্যালয় কৰ্তৃপক্ষই জনাইছে।