🎯 মার্কিন আদালতৰ ৮ বছৰ কাৰাদণ্ড ব্রাজিলিয়ান টোৰেছক
নিয়মীয়া বাৰ্তা ডিজিটেল, ১৭ জুলাইঃ ব্রাজিলৰ এগৰাকী জনপ্রিয় মডেলৰ বিৰুদ্ধে উঠিছে নাৰী সৰবৰাহৰ অভিযোগ৷ এই মডেলগৰাকী ছ’চিয়েল মিডিয়া ইনফ্লুৱেঞ্চাৰ হিচাপেও পৰিচিত৷ ইনষ্টাগ্রামত নিয়মীয়াকৈ স্বাস্থ্য সম্পর্কীয় পৰামর্শৰ ভিডিঅ’ পোষ্ট কৰে মডেলগৰাকীয়ে৷ শেহতীয়াকৈ মার্কিন চোৰাংচোৱা সংস্থা এফবিআইৰ তদন্তত পোহৰলৈ আহে যে নিজৰ অনুগামী তথা ফল’ৱার্ছসকলক প্রতাৰণা কৰি আহিছিল এই মডেলগৰাকীয়ে৷ একাধিক মহিলা অনুগামীক বলপূর্বকভাৱে যৌনতাত লিপ্ত হ’বলৈও বাধ্য কৰাইছিল মডেলগৰাকীয়ে৷ চাঞ্চল্যকৰ এই অপৰাধ প্রমাণ হোৱাৰ পাছত ৮ বছৰ কাৰাদণ্ড বিহা হৈছে মডেলগৰাকীক৷ ব্রাজিলিয়াম এই মডেলগৰাকীৰ নাম কেট টোৰেছ৷ বর্তমান আমেৰিকাৰ বাসিন্দা তেওঁ৷ মাজতে প্রচাৰ চলিছিল যে টাইটানিকৰ অভিনেতা লিঅ’নার্ডো ডি কাপ্রি’ৰ সৈতেও প্রণয়ৰ সম্পর্ক আছিল টোৰেছৰ৷ উল্লেখনীয় সুন্দৰী মডেলগৰাকীৰ অনুগামীৰ সংখ্যা কম সময়ৰ ভিতৰতে বৃদ্ধি পাইছিল ছ’চিয়েল মিডিয়াত৷ ইয়াৰ মাজতে দুগৰাকী মহিলাই দাবী কৰে যে টোৰেছে তেওঁলোকক সৰবৰাহ কৰিছিল অন্য স্থানলৈ৷ মডেলগৰাকীয়ে যেতিয়া এই মহিলা দুগৰাকীক নিজৰ ঘৰত ৰাখিছিল, তেতিয়া তেওঁলোকৰ বেদনাদায়ক অভিজ্ঞতা হৈছিল৷ প্রতাৰিত মহিলাসকলে জানিব দিয়া অনুসৰি বিলাসী জীৱনত অভ্যস্থ টোৰেছে তেওঁৰ অনুগামী মহিলাসকলক পতিতা বৃত্তিত লিপ্ত হ’বলৈ বাধ্য কৰাইছিল৷ হলীউডৰ তাৰকাসকলৰ সৈতে সঘনে ঘূৰা–ফুৰা কৰা দেখি টোৰেছৰ প্রতি আকর্ষিত হৈছিল বহু যুৱতী তথা তৰুণী৷ উল্লেখনীয় যে ‘যাদু বিদ্যা’ৰ অনুষ্ঠান চলাই টোৰেছে মহিলাসকলক পতিতা বৃত্তিৰ প্রতি আকর্ষিত কৰিছিল৷ ইয়াৰ ফলত বৃহৎ অংকৰ ধন লাভ কৰিছিল মডেলগৰাকীয়ে৷ ২০গৰাকী মহিলাৰ অভিযোগৰ ভিত্তিত তদন্ত চলায় এফবিআয়ে৷ এফবিআইৰ তদন্তত চাঞ্চল্যকৰ তথ্য পোহৰলৈ অহাৰ পাছতে আদালতে ৮ বছৰ কাৰাদণ্ডৰ ৰায় শুনায় মডেলগৰাকীক৷