নিয়মীয়া বার্তা, ২৭মেঃ ক’ভিড–১৯ৰ বিৰুদ্ধে বিশ্ববাসীৰ সংগ্রাম অব্যাহত থকাৰ মাজতে ঔষধ প্রস্তুতকাৰী প্রতিষ্ঠানসমূহে কার্যকৰী আৰু নিৰাপদ ভেকচিন উদ্ভাৱনৰ গৱেষণাত যথেষ্ট সুফল লাভ কৰিবলৈ সক্ষম হৈছে৷ এই মুহূর্তত ১০০টাৰো অধিক প্রয়োগ মানৱ দেহত ভেকচিন উদ্ভাৱনৰ গৱেষণা অব্যাহত আছে আৰু এইক্ষেত্রত বিশেষ সফলতা লাভ কৰা বুলি দাবী কৰিছে আমেৰিকাৰ ঔষধ প্রস্তুতকাৰক মডার্না আৰু চীনৰ কেছিনো বায়’লজিক্স ইনকর্প’ৰেচনে৷ ইতিমধ্যে এই দুয়োটা প্রতিষ্ঠানে মানৱ দেহত ক’ভিড–১৯ ভেকচিনৰ পৰীক্ষামূলক প্রয়োগ সফল হোৱা বুলি আনুষ্ঠানিকভাৱে ঘোষণা কৰিছে৷ ইয়াৰ মাজতে আন এক সুখবৰ প্রেৰণ কৰিছে আমেৰিকাৰ ঔষধ প্রস্তুতকাৰক ন’ভাভেক্সে৷ আজিৰ পৰা প্রতিষ্ঠানটোৱে তেওঁলোকৰ ক’ভিড–১৯ ভেকচিন মানৱ শৰীৰত পৰীক্ষামূলকভাৱে প্রয়োগ কৰাৰ কাম আৰম্ভ কৰিছে৷ অষ্ট্রেলিয়াত চলোৱা এই পৰীক্ষাৰ ফলাফল চলিত বছৰৰ ভিতৰতে নিশ্চিত কৰিব পৰা যাব বুলি ন’ভাভেক্সে আশা প্রকাশ কৰিছে৷
ন’ভেল ক’ৰোনা ভাইৰাছত এইপর্যন্ত প্রায় ৫.৬ নিযুত লোক আক্রান্ত হৈছে৷ এই মহামাৰীয়ে বিশ্বৰ প্রায় ৩.৫ লাখ লোকৰ প্রাণ কাঢ়ি নিছে৷ ক’ভিড–১৯ৰ চিকিৎসাৰ উপযুক্ত ঔষধ বা এণ্টিভাইৰেল প্রস্তুত কৰাটো এইপর্যন্ত সম্ভৱ হৈ নুঠাত চিকিৎসাৰ সৈতে জড়িত ব্যক্তি–স্বাস্থ্যকর্মী– একপ্রকাৰ অসহায় অৱস্থাত পৰিছে৷ ইব’লা বা আন ভাইৰাছৰ তুলনাত কম প্রাণঘাতী বা মাৰাত্মক বুলি দাবী কৰা হৈছে যদিও ক’ৰোনা ভাইৰাছৰ ব্যাপক সংক্রমণ আৰু এই ভাইৰাছৰ আৰ এন এৰ সঘন ৰূপান্তৰে উদ্বিগ্ণতাৰ সৃষ্টি কৰিছে৷
ইয়াৰ বাবে ভেকচিনৰ গৱেষণাৰ ওপৰত বিশ্ববাসীয়ে আশাৰে দৃষ্টি নিবদ্ধ ৰাখিছে৷ ইয়াৰ মাজতে মডার্না, কেছিনো বায়’লজিক্স আৰু ন’ভাভেক্সে ভেকচিন উদ্ভাৱনৰ ক্ষেত্রত লাভ কৰা অগ্রগতিয়ে আশাৰ বতৰা কঢ়িয়াইছে৷ ইপিনে, আমেৰিকাই ক’ৰোনা প্রতিৰোধত সফল হোৱাৰ সম্ভাৱনা থকা ছটা ভেকচিন বাছনি কৰি ১ লাখ স্বেচ্ছাসেৱকৰ ওপৰত পৰীক্ষামূলকভাৱে প্রয়োগ কৰাৰ এক আঁচনি প্রস্তুত কৰিছে৷
আশা কৰা হৈছে যে এই অভিযানৰ পাছত চলিত বর্ষৰ সামৰণিৰ পূর্বেই সম্পূর্ণ নিৰাপদ আৰু কার্যক্ষম ভেকচিন প্রদানৰ প্রক্রিয়া আৰম্ভ কৰিব পৰা যাব৷ লক্ষণীয় যে এইপর্যন্ত কমেও ১০বিধ ক’ভিড–১৯ ভেকচিন মানৱ শৰীৰত পৰীক্ষামূলকভাৱে প্রয়োগ কৰা হৈছে৷ পৰীক্ষামূলক ভেকচিন এনেদৰে প্রস্তুত কৰা হৈছে, যাতে ক’ৰোনা ভাইৰাছৰ বহিঃভাগত থকা কাঁইটৰ দৰে স্পাইক প্র’টিন চিনাক্ত কৰাত সহায় কৰে মানুহৰ ৰোগ প্রতিৰোধ ব্যৱস্থাক৷ শৰীৰত ক’ভিড ভাইৰাছৰ প্রৱেশৰ লগে লগে ৰোগ প্রতিৰোধ ব্যৱস্থা সক্রিয় হৈ পৰে৷
অনুৰূপভাৱে প্রস্তুত কৰা ন’ভাভেক্সৰ ভেকচিনNVX-Cov2373 প্রথম পর্যায়ত ১৩১জন স্বেচ্ছাসেৱকৰ শৰীৰত প্রয়োগ কৰাৰ কাম আজিৰ পৰা আৰম্ভ হৈছে৷ ইপিনে, ভাৰততো ভেকচিন উদ্ভাৱনৰ গৱেষণাই অগ্রগতি লাভ কৰিছে৷ ইণ্ডিয়ান কাউন্সিল অৱ মেডিকেল ৰিছার্চে (আই চি এম আৰ) জনোৱা মতে, ছমাহৰ ভিতৰত ভাৰতত ক’ভিড–১৯ ভেকচিনৰ মানৱ দেহত পৰীক্ষামূলক প্রয়োগ আৰম্ভ হ’ব৷ আই চি এম আৰ ভাৰত বায়’টেক ইণ্টাৰনেচনেল লিমিটডে (বি বি আই এল) যৌথভাৱে ভেকচিনৰ গৱেষণা অব্যাহত ৰাখিছে৷ জাইডাছ কেডিলাই দুটা, ছেৰাম ইনষ্টিটিউট, বায়’লজিকেল ই, ইণ্ডিয়ান ইমিউন’লজিকেলছ আৰু মিনভেক্সেও এটাকৈ ভেকচিনৰ গৱেষণা চলাই আছে৷