নিয়মীয়া বাৰ্তা, ২৪ ফেব্ৰুৱাৰীঃ আমেৰিকাৰ দুঃসাহসী ৰকেটমেন হিচাপে পৰিচিত মাইক হাগেছৰ দুর্ঘটনাত মৃত্যু হৈছে৷ ৬৪ বছৰীয়া হাগেছে ঘৰতে নির্মিত ৰকেট এটা উৎক্ষেপণ কৰি দুর্ঘটনাত পতিত হয়৷ ৰকেটটোৱে আকাশমার্গলৈ উৰা মৰাৰ কিছুসময় পিছতেই তললৈ নামি আহি কেলিফ’র্নিয়াৰ মৰুভূমিত খুন্দা মাৰে৷
ঘটনাস্থলীতে হাগেছৰ দেহাৱসান ঘটে৷ নিজে নির্মাণ কৰা এই ৰকেটটো শনিবাৰে বার্ষ্টোৰ পৰা হাগেছে উৎক্ষেপণ কৰা ভিডিঅ’ ইতিমধ্যে ছ’চিয়েল মিডিয়াত প্রকাশ পাইছে৷
স্মর্তব্য যে কেলিফ’র্নিয়াত এগৰাকী উন্মাদ দুঃসাহসী হিচাপে পৰিচিত আছিল হাগেছ৷ পৃথিৱীৰ আকাৰ চেপেটা বুলি বিশ্বাস কৰি আহিছিল হাগেছে৷ নিজৰ তত্ত্ব সত্য বুলি প্রমাণিত কৰাৰ বাবেই মহাকাশলৈ যোৱাৰ সংকল্প লৈছিল ৬৪ বছৰীয়া এই দুঃসাহসিক লোকজনে৷ স্মর্তব্য যে আমেৰিকাৰ টেলিভিছনৰ ছায়েন্স চেনেলে হাগেছৰ এই ৰকেটৰ উৰণৰ সবিশেষ দৃশ্য এক কার্যসূচীযোগে সম্প্রচাৰ কৰাৰ সিদ্ধান্ত লৈছে৷