নিয়মীয়া বাৰ্তা, ২২ ফেব্রুৱাৰীঃ মাৰাত্মক ক’ৰোনা ভাইৰাছৰ সংক্রমণৰ কবলত পৰা চীনৰ পৰা ওভতাই অনা ইউক্রেইনী নাগৰিকৰ কেইবাখনো বাছত দেশখনৰ বিক্ষুব্ধ জনতাই আক্রমণ চলোৱাৰ ঘটনাক লৈ সৃষ্টি হৈছে চাঞ্চল্য ৷ ইউক্রেইনৰ মধ্য প’লটভা অঞ্চলৰ নৱী ছানঝাৰিৰ হাস্পতালত চীনৰ পৰা ওভতাই অনা লোকসকলক স্বাস্থ্য পৰীক্ষাৰ বাবে বাছেৰে প্রেৰণ কৰা হৈছিল ৷ তেতিয়াই বিক্ষুব্ধ জনতাই এই বাছবোৰৰ ওপৰত আক্রমণ কৰে ৷ এই ঘটনাৰ পিছতে ৰাষ্ট্রপতি ভ’ল’ডিমিৰ জেলেনস্কীয়ে জনতাক সহমর্মিতা প্রদর্শন কৰিবলৈ অনুৰোধ জনাইছে ৷ ক’ৰোনাৰ দ্বাৰা দেশখনত বিভীষিকাৰ সৃষ্টি হ’ব পাৰে বুলি আশংকা কৰিয়েই বিক্ষুব্ধ লোকসকলে চীনৰ পৰা উভতি অহা নাগৰিকসকলক আক্রমণ কৰিছে ৷