ক’ৰোনা আতংকৰ মাজতো কূটাঘাতৰ ষড়যন্ত্র

নিয়মীয়া বাৰ্তা, ১৭ এপ্রিলঃ মাৰাত্মক ক’ভিড–১৯ বা ক’ৰোনা ভাইৰাছৰ সংক্রমণে বিশ্বজুৰি বিভীষিকা সৃষ্টি কৰাৰ সময়তো ভাৰতবিৰোধী ষড়যন্ত্র বন্ধ কৰা নাই প্রতিৱেশী বৈৰী ৰাষ্ট্র পাকিস্তানে৷ জম্মু–কাশ্মীৰত নিয়োজিত ভাৰতীয় নিৰাপত্তা কর্মীৰ ওপৰত সন্ত্রাসবাদী আক্রমণ চলোৱাৰ পৰিকল্পনা চলাইছে পাকিস্তানে৷ শেহতীয়াকৈ চোৰাংচোৱাই লাভ কৰিছে এই তথ্য৷ চোৰাংচোৱাৰ তথ্য আহি পৰিছে জি নিউজৰ হাতত৷ তথ্য অনুসৰি কুখ্যাত সন্ত্রাসবাদী সংগঠন লস্কৰ–ই–তৈবা (এলইটি)ৰ সহায়ত পাকিস্তানে নতুনকৈ দুটা সন্ত্রাসবাদী সংগঠন জন্ম দিছে৷ এই সন্ত্রাসবাদী সংগঠন দুটা হৈছে ‘দ্য ৰেজিষ্টেন্স ফ্রণ্ট’ (টিআৰএফ) আৰু ‘তেহৰিক–ই–মিলাট–ই–’ (টিএমআই)৷ পাকিস্তানী চোৰাংচোৱা সংস্থা আই এছ আয়ে প্রত্যক্ষভাৱে এই সন্ত্রাসবাদী সংগঠন দুটা জন্ম দিছে৷ কাশ্মীৰ উপত্যকাত কূটাঘাত সংঘটিত কৰাৰ দীর্ঘদিনীয়া অভিজ্ঞতা থকা লস্কৰ–ই–তৈবাৰ কেইবাজনো কুখ্যাত নেতাই এইক্ষেত্রত সহায় আগবঢ়াইছে আই এছ আইক৷ স্মর্তব্য যে ইতিমধ্যে যাতে টি এম আইৰ কমাণ্ডাৰ নঈম ফিৰডুছে এক অডি’ বার্তাযোগে কাশ্মীৰ উপত্যকাত কূটাঘাত সংঘটিত কৰি থকা সকলো সন্ত্রাসবাদী সংগঠনক ঐক্যবদ্ধ হ’বলৈ আহ্বান জনাইছে৷ স্মর্তব্য যে টি আৰ এফ আৰু টি এম আই ছ’চিয়েল মিডিয়াত অধিক সক্রিয়৷ হোৱাটছএপ গ্রুপটো সংগঠন দুটাৰ বহু সদস্য সক্রিয় হৈ আছে৷ উল্লেখনীয় যে লস্কৰ–ই–তৈবাই টি আৰ এফৰ নাম ‘জম্মু–কাশ্মীৰ ফাইটাৰছ’ও ৰাখিছে৷ সন্ত্রাসবাদী সংগঠন দুটাই ইতিমধ্যে সাংগঠনিক ভেটি বিস্তাৰ কৰিবলৈ লৈছে৷