নিয়মীয়া বাৰ্তা, ১৮ এপ্রিলঃ বিশ্বত ক’ৰোনা ভাইৰাছৰ প্রথম অভিকেন্দ্র হিচাপে চিহ্ণিত হোৱা চীনৰ য়ুহানত এই ভাইৰাছবিধত প্রাণ হেৰুওৱা লোকৰ সংখ্যা বৃদ্ধি পাইছে ৷ শুকুৰবাৰে দেশখনৰ ৰাষ্ট্রীয় স্বাস্থ্য আয়োগে প্রকাশ কৰা তথ্য অনুসৰি য়ুহানত পুনৰ ১৩০০ লোকৰ মৃত্যু হৈছে ৷ অর্থাৎ শেহতীয়া তথ্য অনুসৰি চীনত এই মাৰাত্মক ভাইৰাছবিধত আক্রান্ত হৈ প্রাণ হেৰুৱাইছে মুঠ ৪,৬৩৬গৰাকী লোকে ৷ সংবাদ সংস্থা ঝিনহুৱাৰ প্রতিবেদন অনুসৰি পূর্বে ঘোষণা কৰা তথ্যতকৈ ভাইৰাছবিধত প্রাণ হেৰুওৱা লোকৰ সংখ্যা ৪০ শতাংশ বেছি ৷ স্মর্তব্য যে য়ুহানত প্রকৃততে কিমান লোকে ক’ৰোনাত আক্রান্ত হৈ মৃত্যুক আঁকোৱালি লৈছে, তাৰ বিশ্লেষণ আগবঢ়াবলৈ গৈ চীনৰ ৰাষ্ট্রীয় স্বাস্থ্য আয়োগ (এনএইচচি)এ এই তথ্য সদৰী কৰিছে ৷ লক্ষণীয়ভাৱে শেহতীয়াকৈ চীনৰ অভ্যন্তৰৰ পৰা ক’ৰোনাৰ সংক্রমণ কমিছে যদিও বিদেশৰ পৰা উভতি অহা লোকৰ জৰিয়তে নতুনকৈ মাৰাত্মক ভাইৰাছবিধৰ সংক্রমণ ঘটিছে ৷ ৰাষ্ট্রীয় স্বাস্থ্য আয়োগে জানুৱাৰী মাহৰ পৰা প্রতিদিনে সদৰী কৰি আছে ক’ৰোনাত আক্রান্ত বা মৃত্যু হোৱা লোকৰ সংখ্যা ।