বঞ্চনাৰ অন্ত পৰিব বাংলাদেশৰ ৩ কোটি হিন্দুৰঃ বাংলাদেশৰ হিন্দু নেতাৰ মিশ্রিত প্রতিক্রিয়া

নিয়মীয়া বাৰ্তা,১৪ ডিচেম্বৰঃ নাগৰিকত্ব সংশোধনী বিধেয়ক সংসদৰ দুয়ো সদনতে গৃহীত হোৱাৰ পিছত বাংলাদেশৰ হিন্দু নেতাসকলে মিশ্রিত প্রতিক্রিয়া প্রকাশ কৰিছে ৷ কিছুসংখ্যক নেতাই এই বিল গৃহীত কৰাত ভাৰতৰ বিজেপি চৰকাৰক অভিনন্দন জনোৱাৰ বিপৰীতে আন একাংশ নেতাই এই আইনক লৈ আশংকা প্রকাশ কৰি সংশোধনৰ দাবী কৰিছে ৷

বাংলাদেশ জাতীয় হিন্দু মহাজোঁটৰ মহাসচিব গোবিন্দ প্রামাণিকে সংশোধিত নাগৰিকত্ব বিধেয়ক গৃহীত কৰাত ভাৰতৰ প্রধানমন্ত্রী নৰেন্দ্র মোদী আৰু কেন্দ্রীয় গৃহমন্ত্রী অমিত শ্বাহক ধন্যবাদ জ্ঞাপন কৰে ৷ তেওঁ কয় যে এই আইনৰ বাবে ১৯৪৭ চনত দেশ বিভাজনৰ সময়ত ভাৰতৰ পৰা বাংলাদেশলৈ অহা প্রায় ৩ কোটি হিন্দু ধর্মৰ লোকৰ দীর্ঘদিনৰ বঞ্চনা দূৰ হ’ব আৰু ভাৰতৰ নাগৰিকত্বৰ অধিকাৰ লাভ কৰিব ৷

আনহাতে, অসমৰ এন আৰ চিত বাদ পৰা ১৯ লাখ লোকৰ পৰা ১২ লাখ হিন্দুৰ নাগৰিকত্বৰ সমস্যা দূৰ হ’ব ৷ ইফালে, বাংলাদেশ হিন্দু–বৌদ্ধ–খ্রীষ্টান ঐক্য পৰিষদে নাগৰিকত্ব আইনৰ প্রতি মৌন সমর্থন জনালেও কিছু উদ্বেগো প্রকাশ কৰিছে ৷ শুকুৰবাৰে ঢাকাত অনুষ্ঠিত এখন সংবাদ মেলত বাংলাদেশ হিন্দু–বৌদ্ধ–খ্রীষ্টান ঐক্য পৰিষদৰ সাধাৰণ সম্পাদক ৰাণা দাসগুপ্তই এই আইনৰ সংশোধনৰ দাবী কৰিছে ৷ ১৯৪৭ চনৰ পৰা বর্তমান পর্যন্ত বাংলাদেশত সংখ্যালঘুৰ পৰিসংখ্যা তুলি ধৰি তেওঁ কয় যে ১৯৪৭ চনত দেশ বিভাজনৰ সময়ত বাংলাদেশ অংশত ধর্মীয় সংখ্যালঘুৰ সংখ্যা আছিল ২৩ শতাংশৰ বেছি ৷

বাংলাদেশ স্বাধীন হোৱাৰ সময়ত এই পৰিমাণ কমি ৯ শতাংশৰ তললৈ নামে ৷ নাগৰিকত্ব আইন গৃহীত হোৱাৰ পিছত হিন্দু লোকসকলে নাগৰিকত্বৰ আশাত ভাৰতলৈ যাব বুলি আশংকা প্রকাশ কৰে হিন্দু নেতাজনে ৷ আইনখনৰ সমর্থন জনালেও ইয়াৰ কিছু সংশোধনৰো দাবী জনায় ৷ উল্লেখ্য যে ভাৰতে নাগৰিকত্ব সংশোধনী আইন গৃহীত কৰাৰ পিছত বাংলাদেশ চৰকাৰেও প্রতিক্রিয়া প্রকাশ কৰি বিদেশ মন্ত্রী আৰু গৃহমন্ত্রীৰ নির্ধাৰিত ভাৰত ভ্রমণ বাতিল কৰিছিল ৷