নিয়মীয়া বাৰ্তা, ১৬ এপ্রিলঃ দ্বিতীয় বিশ্বযুদ্ধত অংশগ্রহণ কৰা ব্রাজিলৰ প্রাক্তন সেনা বিষয়া আৰমাণ্ডো পিভেটা ক’ৰোনা ভাইৰাছৰ সংক্রমণৰ পৰা মুক্ত হৈছে ৷ দ্বিতীয় বিশ্বযুদ্ধত আফ্রিকাত ব্রাজিলিয়ান বাহিনীত যোদ্ধা হিচাপে অংশগ্রহণ কৰিছিল ছেকেণ্ড লেফটেনেণ্ট আৰমাণ্ডো পিভেটাই ৷ ৯৯ বছৰীয়া পিভেটা ক’ৰোনা ভাইৰাছত সংক্রমিত হৈ ব্রাছিলিয়াৰ সশস্ত্র বাহিনী হাস্পতালত চিকিৎসাধীন হৈছিল ৷ মঙলবাৰে ক’ৰোনাৰ সংক্রমণৰ পৰা মুক্ত হোৱাৰ পাছতে পিভেটাক ঘৰলৈ প্রেৰণ কৰিছে হাস্পতাল কর্তৃপক্ষই ৷ উল্লেখনীয় যে শতবর্ষ স্পর্শ কৰিবলৈ ওলোৱা পিভেটাক হাস্পতালৰ পৰা বিদায় দিয়া সময়ত চিকিৎসক আৰু নার্ছসকলে প্রাক্তন সেনা বিষয়াগৰাকীৰ সন্মানার্থে বিভিন্ন বাদ্যযন্ত্র বজায় ৷