নিয়মীয়া বাৰ্তা, ১৯ ডিচেম্বৰঃ মাউণ্ট এভাৰেষ্ট বগোৱাৰ ক্ষেত্রত পর্বত আৰোহণকাৰীসকলৰ বাবে পূর্বৰ নীতি সলনি কৰিব লাগে বুলি নেপাল চৰকাৰক দাবী জনাই আহিছে বহু পর্বতাৰোহীয়ে ৷ শেহতীয়াকৈ নেপাল চৰকাৰে এভাৰেষ্ট বগাবলৈ গৈ বহু পর্বত আৰোহী নিহত হোৱা ঘটনাৰ পিছত নতুন নীতি বলৱৎ কৰাৰ প্রস্তাৱ আগবঢ়াইছে ৷
উল্লেখনীয় যে এই প্রস্তাৱ অনুসৰি পর্বত আৰোহীসকলে মাউণ্ট এভাৰেষ্ট বগোৱাৰ ক্ষেত্রত পূর্বৰ দৰে সহজতে অনুমতি লাভ নকৰিব ৷ চলিত বর্ষত এভাৰেষ্ট বগাবলৈ গৈ বিভিন্ন দেশৰ ১১গৰাকী পর্বত আৰোহীয়ে প্রাণ হেৰুৱাবলগীয়া হৈছে ৷
এতিয়াৰে পৰা মাউণ্ট এভাৰেষ্ট বগাবলৈ অনুমতি লাভ কৰিবলৈ হ’লে নেপালত ৬,৫০০ মিটাৰ উচ্চতাৰ শৃংগ বগোৱাৰ অভিজ্ঞতা থাকিব লাগিব ৷ এই অভিজ্ঞতা নাথাকিলে দুর্গম হিমালয়ান ৰাষ্ট্রখনত পর্বত আৰোহণৰ অনুমতি দিয়া নহ’ব ৷ অর্থাৎ এভাৰেষ্ট বগোৱাৰ ক্ষেত্রত পর্বত আৰোহণকাৰী সকলৰ বাবে আহি পৰিছে নতুন প্রত্যাহ্বান ৷