নিয়মীয়া বার্তা, ২৮ জুনঃ ৰাষ্ট্রীয় স্মৃতিসৌধ লণ্ডভণ্ড কৰাটো গুৰুতৰ অপৰাধ হিচাপে গণ্য কৰি তেনে লোকক ১০ বছৰৰ কাৰাবাস দিয়া হ’ব৷ আমেৰিকা যুক্তৰাষ্ট্রৰ ৰাষ্ট্রপতি ড’নাল্ড ট্রাম্পে আজি এই সিদ্ধান্তৰ এক কার্যকৰী নির্দেশত স্বাক্ষৰ কৰে৷ উল্লেখ্য যে যোৱা ২৫ মে’ত এফ্র’ আমেৰিকান জর্জ ফ্লয়ডৰ আৰক্ষীৰ হাতত মৃত্যু ঘটাৰ পিছতে দেশজুৰি আন্দোলনে হিংসাত্মক পৰিস্থিতি সৃষ্টি কৰিছিল৷ এই আন্দোলনৰ সময়ত একাংশই ৰাষ্ট্রীয় স্মৃতিসৌধসমূহ লণ্ডভণ্ড কৰাৰ লক্ষ্য হিচাপে লৈছিল৷ ইয়াৰ পৰিপ্রেক্ষিততেই ৰাষ্ট্রীয় স্মৃতিসৌধসমূহ সুৰক্ষিত কৰাৰ প্রতি গুৰুত্ব দি ৰাষ্ট্রপতি ট্রাম্পে ৰাষ্ট্রীয় স্মৃতিসৌধ লণ্ডভণ্ড কৰাজনৰ বিৰুদ্ধে কঠোৰ পদক্ষেপ গ্রহণ কৰাৰ নির্দেশত স্বাক্ষৰ কৰে৷ কোনো কাৰণতেই আন্দোলনৰ নামত যাতে স্মৃতিসৌধ বিনষ্ট নহয়, তাক প্রাধান্য দি নির্দেশমতে এনে কার্যত জড়িত লোকক ১০ বছৰ কাৰাবাস দিয়া হ’ব৷ তাৎপর্যপূর্ণ যে নৈৰাজ্যবাদী আৰু বাঁওধাৰাৰ কট্টৰপন্থীয়ে আন্দোলনৰ সময়ত আমেৰিকা যুক্তৰাষ্ট্রৰ বিভিন্ন স্থানত স্মৃতিসৌধৰ লগতে ধর্মীয় স্থান আক্রমণৰ লক্ষ্য কৰি লৈছিল৷ এই আন্দোলনৰ সময়ত মহাত্মা গান্ধীৰ প্রতিমূর্তি এটাও একাংশই লণ্ডভণ্ড কৰিছিল৷