বিশেষ বাৰ্তা, ১৫ অক্টোবৰ : মহাৰাষ্ট্রত শোকাৱহ পথ দুর্ঘটনাত প্রাণ হেৰুৱাইছে ১২গৰাকী লোকে৷ এই দুর্ঘটনাত আহত হৈছে কমপক্ষেও ২৩জন৷ কালি গভীৰ নিশা দুর্ঘটনা সংঘটিত হৈছে ছত্রপতি শম্ভজি নগৰ জিলাত৷ আৰক্ষী সূত্রই সদৰী কৰা অনুসৰি, এখন ট্রাকৰ সৈতে মিনিবাছ এখন সংঘর্ষত পতিত হোৱাৰ ফলত ঘটনাস্থলীতে ১২জনৰ মৃত্যু হয়৷ সমৃদ্ধি এক্সপ্রেছৱেত নিশা ১২বজাত সংঘটিত হয় এই দুর্ঘটনা৷ পথেৰে তীব্র গতিত গৈ থকা মিনিবাছখনে নিয়ন্ত্রণ হেৰুৱাই এখন ট্রাকত গৈ খুন্দিওৱাৰ ফলত ঘটনাস্থলীতে ১২গৰাকী লোকে প্রাণ হেৰুৱায়৷ আৰক্ষী সূত্রই সদৰী কৰা অনুসৰি, নিহতসকলৰ ভিতৰত ৬গৰাকী মহিলা আৰু এটি শিশুও আছে৷ আহতসকলক উদ্ধাৰ কৰি স্থানীয় হাস্পতালত ভর্তি কৰোৱা হৈছে৷ দুর্ঘটনাৰ সময়ত বাছখনত মুঠ ৩৫গৰাকী যাত্রী আছিল বুলি স্থানীয় সংবাদ মাধ্যমে সদৰী কৰিছে৷ উল্লেখনীয় যে স্থানীয় বাসিন্দাসকলে আৰক্ষীৰ দল উপস্থিত হোৱাৰ পূর্বেই উদ্ধাৰ অভিযান আৰম্ভ কৰে৷