নিয়মীয়া বাৰ্তা, ২৫ এপ্ৰিলঃ চীনৰ ক’ৰোনা ভাইৰাছৰ অভিকেন্দ্র হিচাপে চিহ্ণিত হুবেই প্রদেশৰ য়ুহান চহৰত বিগত কেইবাদিনো ধৰি নতুনকৈ ক’ৰোনাত আক্রান্ত হোৱা নাই এজনো লোক৷ নাইবা এই ভাইৰাছ বিধৰ দ্বাৰা সংক্রমিত কোনো লোকৰ শেহতীয়াকৈ য়ুহানত মৃত্যু হোৱা নাই৷
স্মর্তব্য যে বিগত ৮ এপ্রিলত য়ুহানৰ পৰা চীনে তলাবন্ধ প্রত্যাহাৰ কৰিছে৷ লক্ষণীয়ভাৱে শেহতীয়াকৈ চীনত ক’ৰোনাৰ দ্বাৰা সংক্রমিত লোকৰ সংখ্যা যথেষ্ট হ্রাস পাইছে৷ আজি দেশখনৰ ৰাষ্ট্রীয় স্বাস্থ্য আয়োগে সদৰী কৰা অনুসৰি বিগত ২৪ ঘণ্টাত সমগ্র চীনত ক’ৰোনা ভাইৰাছৰ দ্বাৰা সংক্রমিত হৈছে মাত্র ৬গৰাকী লোক৷
ইয়াৰ বিপৰীতে ইউৰোপ আমেৰিকাকে ধৰি বিশ্বৰ বিভিন্ন প্রান্তত প্রতিদিনে হাজাৰ হাজাৰ লোক মাৰাত্মক ভাইৰাছৰ ভাইৰাছবিধৰ দ্বাৰা সংক্রমিত হৈছে৷ আমেৰিকাত প্রায় ৮.৬০ লাখ লোক এই ভাইৰাছবিধৰ দ্বাৰা সংক্রমিত হোৱাৰ উপৰি দেশখনত প্রাণ হেৰুৱাইছে ৫০ হাজাৰ লোকে৷