নিয়মীয়া বাৰ্তা, ৩০ ছেপ্টেম্বৰঃ ভাৰত মহাসাগৰৰ উপকূলত চীনৰ জাহাজ তথা ৰণতৰীৰ গতিবিধি নিৰীক্ষণ কৰিবলৈ মালদ্বীপক ভাৰতে এখন ড’র্নিয়াৰ বিমান আগবঢ়োৱাৰ সিদ্ধান্ত লৈছে৷ ভাৰত মহাসাগৰত গুৰুত্বপূর্ণ অর্থনৈতিক অঞ্চলত মালদ্বীপ আৰু নতুন দিল্লী প্রশাসনে যৌথভাৱে নিৰীক্ষণ ব্যৱস্থা গঢ়ি তোলাৰ সিদ্ধান্ত লৈছে৷
মালদ্বীপ ৰাষ্ট্রীয় প্রতিৰক্ষা বাহিনী (এমএনডিএফ)ৰ নিয়ন্ত্রণত থাকিব এই ড’র্নিয়াৰ বিমানখন৷ ড’র্নিয়াৰ বিমানখন চলোৱাৰ ক্ষেত্রত ভাৰতীয় নৌসেনাই সাতগৰাকী এম এন ডি এফৰ কর্মীক প্রশিক্ষণ দিছে৷ এই কর্মীসকলৰ ভিতৰত আছে পাইলট, অভিযন্তা তথা আকাশমার্গৰ পৰা সামুদ্রিক বাহনৰ গতিবিধি নিৰীক্ষণৰ দায়িত্বত থকা কর্মী৷