নিয়মীয়া বাৰ্তা, ১২ এপ্ৰিলঃ ক’ভিড–১৯ মহামাৰীত মৃত্যুমুখত পৰাৰ আশংকা কৰি বেইজিঙত বিগত বর্ষটোত যুৱপ্রজন্মৰ গৰিষ্ঠসংখ্যক লোকে সম্পত্তিৰ উত্তৰাধিকাৰী ঠিক কৰি থ’বলৈ ইচ্ছাপত্রত স্বাক্ষৰ কৰিছে৷ চীনৰ পঞ্জীয়ন কেন্দ্রৰ তথ্যৰ উদ্ধৃতি দি এই কথা প্রকাশ কৰিছে ‘ছাউথ চাইনা মর্নিং পোষ্ট’ নামৰ কাকতখনে৷ উল্লেখনীয় যে ১৯৯০ চনৰ পিছত জন্মগ্রহণ কৰা চীনা তৰুণ–তৰুণীসকলৰ্ মাজত ২০১৯ৰ পৰা ২০২০ চনৰ ভিতৰত ইচ্ছাপত্র লিখাৰ হাৰ ৬০ শতাংশ বৃদ্ধি পাইছে৷
ইয়াৰ পূর্বে যুৱক–যুৱতী তথা তৰুণ প্রজন্মৰ লোকে উত্তৰাধিকাৰ কাক প্রদান কৰিব সেই সন্দর্ভত এনেদৰে ইচ্ছাপত্র লিখা নাছিল৷ ক’ভিড–১৯ মহামাৰীয়ে চীনা যুৱক–যুৱতী তথা তৰুণ–তৰুণীসকলৰ্ মাজত সৃষ্টি কৰিছে হতাশা৷ যাৰ বাবে এই মহামাৰীত প্রাণ হেৰুওৱাৰ পূর্বে সম্পত্তিৰ উত্তৰাধিকাৰ নিষ্কণ্টক কৰি থ’ব বিচাৰিছে বহু চীনা যুৱক–যুৱতী তথা তৰুণ–তৰুণীয়ে৷ অৱশ্যে বেইজিং প্রশাসনে এই সন্দর্ভত কোনো ধৰণৰ প্রতিক্রিয়া প্রকাশ কৰা নাই৷