নিয়মীয়া ডিজিটেল ডেস্ক, ৫ জানুৱাৰী : বিশ্বৰ ভিতৰতে সৰ্বাধিক দ্ৰুতগতিত বৃদ্ধি পাইছে ভাৰতৰ অৰ্থনীতি। মোদী চৰকাৰৰ এই দাবীত ৰাষ্ট্ৰসংঘই ছীল-মোহৰ মাৰি দিলে। বিশ্ব বিত্তীয় পৰিস্থিতি আৰু সম্ভাৱনা ২০২৪ শীৰ্ষক প্ৰতিবেদনত ৰাষ্ট্ৰসংঘই প্ৰকাশ কৰিছে যে ২০২৪ বিত্তীয় বৰ্ষতো ভাৰতৰ অৰ্থনীতি সৰ্বাধিক দ্ৰুতগতিত বৃদ্ধি পাব। ৰাষ্ট্ৰসংঘৰ (UN) প্ৰতিবেদন অনুসৰি, ভাৰতৰ সামগ্ৰিক বৃদ্ধিৰ হাৰ অৰ্থাৎ জিডিপি বৃদ্ধিৰ হাৰ ২০২৪ চনত ৬.২ শতাংশ হ’বলৈ গৈ আছে। যদিও ২০২৩ চনৰ তুলনাত এই হাৰ কিছু কম। ২০২৩ চনত ভাৰতৰ বিত্তীয় বৃদ্ধি ৬.৩ শতাংশ। সূত্ৰৰ মতে, এই সফলতাৰ কাৰণ হৈছে নিৰ্মাণ, খনি বা সেৱা খণ্ডত ভাল প্ৰদৰ্শন। ইয়াৰ লগতে বিশেষজ্ঞসকলে কয় যে সেৱা খণ্ডত গ্ৰাহকৰ চাহিদা বৃদ্ধি বা চাহিদা বৃদ্ধিৰ দৰে বিভিন্ন বিষয়েও উল্লেখযোগ্য ভূমিকা গ্ৰহণ কৰিছে। একাংশ অৰ্থনীতিবিদে এই মতামত প্ৰকাশ কৰিছিল যে কৰ’নাৰ বাবে ভাৰতৰ আৰ্থিক বিকাশ বন্ধ হৈ যাব। কিন্তু ৰাষ্ট্ৰসংঘৰ এই অধ্যয়নে সেই ধাৰণা সলনি কৰি দিলে। এই কথা জনা যায় যে উন্নয়নশীল দেশসমূহৰ ভিতৰত ভাৰতৰ আৰ্থিক বিকাশ আটাইতকৈ দ্ৰুত।