নিয়মীয়া বাৰ্তা, ১১ মাৰ্চঃ ইউক্রেইনৰ ৰাজধানী কিয়েভৰ পৰা ৩২ কিলোমিটাৰ দূৰত আছে ৰুছ সেনাৰ ৬৪ কিলোমিটাৰ দৈর্ঘ্যৰ কনভয়৷ খাদ্য সংকট, হাড় কঁপোৱা জাৰ আৰু বিভিন্ন কাৰণত এই কনভয়ৰ গতি লেহেম হৈ গৈছে বুলি আন্তর্জাতিক সংবাদ মাধ্যমৰ প্রতিবেদনত প্রকাশ পাইছে৷ শেহতীয়াকৈ ইউক্রেইনী সেনাৰ গোলাবর্ষণ বা গুলী নহয়, এই কনভয়ৰ বাবে বৃহৎ সংকট হিচাপে দেখা দিছে প্রচণ্ড শীত৷ একপ্রকাৰ ৰুছ সেনাৰ ভয়ংকৰ শত্রু হিচাপে থিয় দিছে হাড় কঁপোৱা জাৰ৷ পূব ইউৰোপত তাপমাত্রা ক্রমান্বয়ে হ্রাস পাই আহিছে৷
ইতিমধ্যে কিয়েভ, খাৰকিভসহ ইয়াৰ পার্শ্বৱর্তী অঞ্চলৰ তাপমাত্রা মাইনাছ ১০ ডিগ্রীৰ তললৈ গৈছে৷ আৰু কেইদিনমানৰ ভিতৰত এই তাপমাত্রা মাইনাছ ২০ ডিগ্রীৰ তললৈ অৱনমিত হ’ব বুলি বতৰ বিজ্ঞানীসকলে ঘোষণা কৰিছে৷ বিগত কেইটামান দিনত অত্যধিক তুষাৰপাত দেখিবলৈ পোৱা গৈছে সমগ্র অঞ্চলটোত৷ এই অৱস্থাত ৰাছিয়াৰ দীর্ঘ কনভয়ত থকা সেনাৰ টেংকবোৰৰ ভিতৰত সৃষ্টি হ’ব প্রচণ্ড জাৰ৷ এই জাৰৰ বাবেই বহু সৈনিকৰ মৃত্যু হ’ব পাৰে বুলি নিউজ উইকৰ এক প্রতিবেদনত দাবী কৰা হৈছে৷ বাল্টিক ছিকিউৰিটী ফাউণ্ডেচনৰ প্রতিৰক্ষা বিশেষজ্ঞ গ্লেন গ্রাণ্টে দাবী কৰা অনুসৰি, যি হাৰত তাপমাত্রা অৱনমিত হৈছে, ৰাছিয়াৰ টেংকবোৰ এটা এটা ফ্রীজাৰত পৰিণত হ’ব৷
তাৰ ভিতৰত সৈনিকসকলে আশ্রয় লৈ থাকিলে মৃত্যু অৱশ্যম্ভাৱী৷ অৱশ্যে টেংকবোৰৰ ইঞ্জিন যদি প্রতিমুহূর্ততে চলাই ৰখা হয়, তেতিয়াহ’লে ৰক্ষা পৰিব সৈনিকসকল৷ কিন্তু টেংকবোৰ প্রতিমুহূর্তত চলাই ৰাখিলে ইন্ধনৰ সংকট সৃষ্টি হ’ব৷ ইয়াৰ উপৰি এনেদৰে দীর্ঘ পথত ৰৈ থকাৰ ফলত ভয়াৱহ খাদ্য সংকটৰো সন্মুখীন হ’ব ৰুছ সৈনিকসকল৷ গতিকে কিয়েভ দখল কৰাটো ৰাছিয়ান বাহিনীৰ বাবে ভয়ংকৰ প্রত্যাহ্বান হৈ পৰিব পাৰে৷ ব্রিটিছ সেনাৰ প্রাক্তন মেজৰ কেভিন প্রাইচৰ মতেও বর্তমান মুহূর্তত ইউক্রেইন অভিমুখী ৰুছ সেনাৰ কনভয়ত সৃষ্টি হৈছে এনে বহু কাৰকক লৈ আতংক৷