বিশেষ বাৰ্তা, ৫ এপ্রিলঃ শুভমন গীলে আইচিচি এদিনীয়া ৰেংকিঙৰ চতুর্থ স্থানলৈ উন্নীত হৈছে৷ ৭৩৮ ৰেটিং পইণ্টেৰে গীলে কেৰিয়াৰ শ্রেষ্ঠ চতুর্থ স্থানটো দখল কৰে৷ বিশ্ব ক্রিকেটৰ সর্বোচ্চ সংস্থা আইচিচিয়ে আজি প্রকাশ কৰা এদিনীয়া ৰেংকিঙৰ বেটাৰৰ তালিকাত পাকিস্তানৰ বাবৰ আজমে শীর্ষস্থান অধিকাৰ কৰি আছে৷ এই শাখাত দক্ষিণ আফ্রিকাৰ ৰাছি ভানডাৰ ডুছেনে দ্বিতীয় আৰু পাকিস্তানৰ ইমাম উল হকে তৃতীয় স্থানটো অধিকাৰ কৰি আছে৷ ইফালে, টীম ইণ্ডিয়াৰ প্রাক্তন অধিনায়ক বিৰাট কোহলিৰ এটা স্থানৰ উন্নতি ঘটিছে৷ অষ্ট্রেলিয়াৰ বিপক্ষে খেলা ঘৰুৱা এদিনীয়া শৃংখলাটোত দাঙি ধৰা উন্নত বেটিং প্রদর্শনৰ সুবাদত টীম ইণ্ডিয়াৰ তাৰকা বেটাৰ কোহলিয়ে ষষ্ঠস্থানলৈ উন্নীত হয়৷ ইফালে, ভাৰতীয় দলটোৰ অধিনায়ক ৰোহিত শর্মাই অষ্টম স্থানটো অক্ষুণ্ণ ৰাখিছে৷ আনহাতে, অষ্ট্রেলিয়াৰ জ’ছ হেজলউডে শীর্ষস্থান দখল কৰি থকা বলিং শাখাত ভাৰতৰ মহম্মদ চিৰাজৰ স্থানৰ কোনো লৰচৰ হোৱা নাই৷ চিৰাজে তৃতীয় স্থানটো নিজৰ দখলতে ৰাখিছে৷ ইফালে, নিউজিলেণ্ডৰ ট্রেণ্ট ব’ল্টে দ্বিতীয় স্থানটো অক্ষুণ্ণ ৰাখিছে৷ বাংলাদেশৰ ছাকিব আল হাছানে শীর্ষস্থান দখল কৰি থকা অলৰাউণ্ড শাখাৰ শীর্ষ ১০ত কোনো ভাৰতীয়ই স্থান লাভ কৰিবলৈ সক্ষম নহ’ল৷