নিয়মীয়া বাৰ্তা ২৬ ডিচেম্বৰঃ তুৰস্কৰ সাৰ প্রস্তুতকাৰী কোম্পানী গুবাৰটাছ আৰু দেশৰ এগ্রিকালচাৰ ক্রেডিট কো–পাৰেটিভছৰ মুৰব্বী ফাহৰেটিন পয়ৰাজে বৃহৎ স্বর্ণভাণ্ডাৰ উদ্ধাৰ কৰিবলৈ সক্ষম হৈছে৷ দেশখনৰ সংবাদ সংস্থা আনাড’লুৱে উল্লেখ কৰা অনুসৰি মাটিৰ তলত উদ্ধাৰ হোৱা এই সোণৰ পৰিমাণ হৈছে ৯৯ টন৷
মার্কিন ডলাৰ হিচাপত ইয়াৰ মূল্য ৬০০ কোটি ডলাৰ৷ ভাৰতীয় টকাৰ হিচাপত এই সোণৰ মূল্য ৪৪ হাজাৰ কোটিতকৈও বেছি৷ লক্ষণীয়ভাৱে বিশ্বৰ কেইবাখনো দেশৰ মুঠ জিডিপিৰ পৰিমাণতকৈও তুৰস্কত উদ্ধাৰ হোৱা সোণৰ মূল্য অধিক হ’ব৷ ৱর্ল্ড’মিটাৰৰ তথ্য অনুসৰি মালদ্বীপৰ জিডিপি হৈছে ৪৮৭ কোটি ডলাৰ৷ সেইদৰে লাইবেৰিয়াৰ জিডিপিৰ পৰিমাণ হৈছে ৩২৯ কোটি ডলাৰ, ভূটানৰ মুঠ জিডিপি ২৫৩ কোটি ডলাৰ৷ অর্থাৎ তুৰস্কত উদ্ধাৰ হোৱা এই সোণৰ মূল্য ২–৩খন দেশৰ মুঠ জিডিপিৰ সমান হিচাপে চিহ্ণিত হৈছে৷ দেশখনত মধ্য–পশ্চিম প্রান্তৰ অঞ্চল ছ’গুত উদ্ধাৰ হৈছে এই স্বর্ণভাণ্ডাৰ৷