নিয়মীয়া বাৰ্তা, ১০ জুনঃ আজি ১৫খন ৰাজ্যৰ ৫৭ ৰাজ্যসভাৰ আসনত নির্বাচন অনুষ্ঠিত হোৱাৰ কথা আছিল৷ কিন্তু ইতিমধ্যে বিনাপ্রতিদ্বন্দ্বিতাৰে ১১ ৰাজ্যৰ ৪১গৰাকী প্রার্থী বিজয়ী হৈছে৷ অর্থাৎ আজি নির্বাচন অনুষ্ঠিত হ’ব ১৬খন আসনৰহে৷ ইয়াৰে মহাৰাষ্ট্রত ৬খন, কর্ণাটকত ৪খন, হাৰিয়ানাত ২খন আৰু ৰাজস্থানত ৪খন আসনত ৰাজ্যসভাৰ নির্বাচন অনুষ্ঠিত হ’ব৷
লক্ষণীয়ভাৱে ৰাজ্যসভাৰ এই নির্বাচনত হর্ছ ট্রেডিঙৰ আশংকা ঘনীভূত হৈছে কংগ্রেছ আৰু বিজেপি শিবিৰত৷ গতিকে, ৰাজস্থানত বিজেপি তথা কংগ্রেছ বিধায়কসকলক যাতে কোনো পক্ষই ক্রয় কৰিব নোৱাৰে, তাৰ বাবে ৰিজ’টলৈ নি ৰখা হৈছে৷ ৰাজস্থানত চাৰিখন আসনৰ এখনত বিজেপিৰ বিজয় নিশ্চিত৷ বাকী তিনিখনত কংগ্রেছ প্রার্থীৰ বিজয় নিশ্চিত বুলি তথ্য পোৱা গৈছে যদিও হর্ছ ট্রেডিঙৰ আশংকাৰ বাবে দলৰ বিধায়কসকলক নিৰাপদ স্থানত ৰখা হৈছে৷