নিয়মীয়া বাৰ্তা, ১৭ জুনঃ কর্ণাটকৰ কমলাপুৰ তালুকৰ মাৰমানছি তাণ্ডাত ১৫গৰাকী ক’ভিড–১৯ আক্রান্ত ৰোগীক কঢ়িওৱা এম্বুলেঞ্চ আৰু স্বাস্থ্য বিভাগৰ কর্মীৰ গাড়ীত শিল নিক্ষেপ কৰা ঘটনাই চাঞ্চল্যৰ সৃষ্টি কৰিছে৷ উল্লেখিত গাঁওখনৰ পৰা ক’ভিড–১৯ আক্রান্ত ৰোগীকেইজনক স্বাস্থ্য বিভাগে এছক’ট দি এম্বুলেঞ্চেৰে হাস্পতাললৈ নি থকাৰ মুহূর্ততে একাংশ গাঁওবাসীয়ে শিল নিক্ষেপ কৰে৷ উল্লেখ্য যে এম্বুলেঞ্চ আৰু স্বাস্থ্য বিভাগৰ গাড়ী গাঁওখনত প্রৱেশ কৰাৰ পিছতেই একাংশ লোকৰ সৈতে বাক্–বিতণ্ডাত লিপ্ত হ’বলগীয়া হয় স্বাস্থ্য বিভাগৰ কর্মী৷ ই এনে পর্যায় পায় যে পিছলৈ উন্মত্ত লোকে এম্বুলেঞ্চ আৰু স্বাস্থ্য বিভাগৰ কর্মীৰ গাড়ীত আক্রমণৰ লক্ষ্য কৰি লৈ শিল নিক্ষেপ কৰে৷ এই ঘটনাত এম্বুলেঞ্চ আৰু আন বাহনৰ সামান্য ক্ষতি হয় যদিও ৰোগী আৰু লোককেইজন কথমপি আঘাতৰ পৰা ৰক্ষা পৰে।