নিয়মীয়া বার্তা, ২৪ জানুুৱাৰীঃ পশ্চিমবংগৰ ৰাজধানী কলকাতাত আয়োজিত এক প্রতিবাদী কার্যসূচীত কালি কেইবাখনো বিশ্ববিদ্যালয়ৰ শিক্ষার্থীয়ে ভাৰতবিৰোধী শ্লোগান দিয়া ঘটনাক কেন্দ্র কৰি উত্তপ্ত পৰিস্থিতিৰ সৃষ্টি হৈছে৷
যাদৱপুৰ বিশ্ববিদ্যালয়ৰ লগতে অন্য কেইবাখনো শিক্ষা প্রতিষ্ঠানৰ শিক্ষার্থীয়ে কালি প্রতিবাদী কার্যসূচীত ‘ভাৰত মাতা ছে আজাদী’, ‘কাশ্মীৰ মাংগে আজাদী’, ‘আছাম মাংগে আজাদী’ আদি বিভিন্ন দেশবিৰোধী শ্লোগান দিয়ে৷
উল্লেখনীয় যে ‘হিন্দুৰাষ্ট্র ইজ ৰেপিষ্ট’ বুলি লিখা দীঘল বেনাৰ লৈ কালি কলকাতাৰ ৰাজপথত শিক্ষার্থীসকলে উলিয়াইছিল এই প্রতিবাদী কার্যসূচী৷ শিক্ষার্থীসকলে ভিক্টোৰিয়া মেম’ৰিয়েলৰ সন্মুখত বিজেপি সাংসদ স্বপন দাশগুপ্ত আৰু বিশ্বভাৰতী বিশ্ববিদ্যালয়ৰ উপাচার্য বিদ্যুৎ চক্রৱর্তীৰ বিতর্কিত মন্তব্যৰ বিৰুদ্ধে কালি উলিয়াইছিল প্রতিবাদী সমদল৷