নিয়মীয়া বাৰ্তা, ২৫ জানুৱাৰীঃ গণৰাজ্য দিৱস বা স্বাধীনতা দিৱসৰ বর্ণাঢ্য অনুষ্ঠান সকলোৰে বাবে আকর্ষণীয়৷ দেশৰ ৰাজধানী দিল্লীৰ ৰাজপথত গণৰাজ্য দিৱসৰ অনুষ্ঠান চোৱাৰ সকলোকে অনুমতি প্রদান কৰা হয়৷ কিন্তু ক’ভিড মহামাৰীৰ বাবে এই বর্ণাঢ্য অনুষ্ঠানত শিশুৰ পৰা বৃদ্ধলৈকে সকলো লোকৰ পূর্বৰ দৰে অংশগ্রহণ সহজ হৈ থকা নাই৷ এইবাৰো দিল্লী আৰক্ষীয়ে জাৰি কৰিছে এলানি নির্দেশ৷ সোমবাৰে জাৰি কৰা এই নির্দেশ অনুসৰি ১৫ বছৰৰ কম বয়সৰ শিশু তথা কিশোৰসকলে গণৰাজ্য দিৱসৰ কুচকাৱাজৰ অনুষ্ঠানত অংশগ্রহণ কৰিব নোৱাৰিব৷
লক্ষণীয়ভাৱে ১৫ৰ পৰা ১৮ বছৰ বয়সৰ তৰুণসকলক ভেকচিন প্রদান প্রক্রিয়া আৰম্ভ হৈছে যদিও ১৫ বছৰৰ তলৰ শিশুসকলে ভেকচিন পোৱা নাই৷ গতিকে এই অনুষ্ঠানত অংশগ্রহণৰ বাবে বয়সৰ সীমা নির্ধাৰণ কৰি দিয়া হৈছে৷ ইফালে, ক’ভিডৰ দুয়োটা ভেকচিন ড’জ নোলোৱা লোকসকলো গণৰাজ্য দিৱসৰ অনুষ্ঠানত উপস্থিত থাকিব নোৱাৰিব৷ ফেচ মাস্ক আৰু শাৰীৰিক দূৰত্ব মানি চলাটো বাধ্যতামূলক৷ এই নিয়ম মানি নচলিলে অনুষ্ঠানৰ পৰা বাহিৰ কৰি দিয়া হ’ব বুলি সতর্কবাণী কৰিছে আৰক্ষীয়ে৷ গণৰাজ্য দিৱসৰ অনুষ্ঠানত পুৱা ৭ বজাৰ ভিতৰতে গৈ আসন গ্রহণ কৰিব লাগিব৷ স্মর্তব্য যে দীর্ঘদিন ধৰি দিল্লীৰ ক’ভিড পৰিস্থিতি উদ্বেগজনক হৈ আছে৷ ক’ৰোনাৰ নতুন প্রকৰণ অমিক্রনত আক্রান্তৰ সংখ্যা দিল্লীত প্রতিদিনে বৃদ্ধি পাইছে৷ গতিকে গণৰাজ্য দিৱসত এই ব্যৱস্থা গ্রহণ কৰিছে দিল্লী আৰক্ষীয়ে৷