নিয়মীয়া বাৰ্তা, ৯ নৱেম্বৰ: গাঁৱৰ নলীনাদৰ পৰা পানী নিয়াৰ ‘অপৰাধ’ত এগৰাকী দলিত লোকক উচ্চবর্ণৰ কেইগৰাকীমান লোকে নৃশংসভাৱে হত্যা কৰাৰ অভিযোগ উঠিছে ৰাজস্থানত৷ কালি নিশা লোমহর্ষক ঘটনাটো সংঘটিত হৈছে ৰাজস্থানৰ সুৰসাগৰ অঞ্চলত৷ ইতিমধ্যে এই ঘটনাত জড়িত থকাৰ অভিযোগত তিনিজনক গ্রেপ্তাৰ কৰিছে আৰক্ষীয়ে৷ আৰক্ষী সূত্রই প্রকাশ কৰা অনুসৰি কালি নিশা গাঁৱৰ টিউবৱেলৰ পৰা প্রায় ৫০ বছৰ বয়সীয়া লোক এজনে পানী আনিবলৈ যায়৷ পাত্রত পানী ভৰাই থকা সময়তে গাঁৱৰ কেইবাজনো যুৱকে আক্রমণ কৰে কিষাণ ভীল নামৰ লোকজনক৷ গুৰুতৰভাৱে আহত কিষাণৰ মৃত্যু হোৱাৰ পিছতে চাকিল, নাছিৰ আৰু বাবলু নামৰ তিনিজনক আৰক্ষীয়ে গ্রেপ্তাৰ কৰিছে৷