নিয়মীয়া বাৰ্তা ১৮ ফেব্ৰুৱাৰীঃ পাকিস্তানৰ কৰাচী অভিমুখে গৈ থকা কার্গ’ জাহাজ এখন জব্দ কৰা হৈছে গুজৰাটৰ কান্লা বন্দৰৰ সমীপত ৷ ৩ ফেব্রুৱাৰীৰ পৰা এই জাহাজখনৰ ওপৰত নজৰ ৰাখিছিল ভাৰতীয় বাহিনীয়ে৷ ইতিমধ্যে জব্দ হোৱা জাহাজখনত আৰম্ভ কৰা হৈছে তদন্ত৷ হংকঙৰ পতাকা সম্বলিত এই জাহাজখনে কৰাচীৰ প’ট কাছিম অভিমুখে গৈ আছে৷ ভাৰতীয় শুল্ক বিভাগৰ বিষয়াই সন্দেহ কৰা অনুসৰি ক্ষেপণাস্ত্র উৎক্ষেপণৰ বাবে এই জাহাজখন ব্যৱহাৰ কৰাৰ সম্ভাৱনা আছিল৷ তাৎক্ষণিকভাৱে এই জাহাজখনৰ ওপৰত পৰীক্ষা চলাইছে প্রতিৰক্ষা গৱেষণা আৰু উন্নয়ন সংস্থা (ডিআৰডি’)ৰ বিষয়াসকলে৷ লক্ষণীয়ভাৱে জাহাজখনৰ পৰীক্ষাৰ বাবে মোতায়েন কৰা হৈছে এদল পৰমাণু বিজ্ঞানীক৷ চীনৰ জিয়াংছু প্রদেশৰ জিয়াংয়িন বন্দৰৰ পৰা কৰাচী অভিমুখে যাত্রা কৰিছিল জাহাজখনে৷ পাকিস্তানৰ মিত্র দেশ চীনে জাহাজখনত বেলিষ্টিক ক্ষেপণাস্ত্র পৰীক্ষাৰ বিভিন্ন সামগ্রী তথা সঁজুলি প্রেৰণ কৰা বুলি সন্দেহ কৰিছে নতুন দিল্লী প্রশাসনে৷ অৱশ্যে এই বাতৰি যুগুতোৱাৰ পৰলৈ বিষয়টো সন্দর্ভত কোনো ধৰণৰ তথ্য সদৰী কৰা নাই প্রশাসনে৷