নিয়মীয়া বাৰ্তা, ২মেঃ নিজৰ জীৱনকো সংকটত পেলাই ক’ৰোনাৰ বিৰুদ্ধে অহৰহ যুঁজ দি অহা চিকিৎসক–স্বাস্থ্যক সন্মান জনাবৰ বাবে পদক্ষেপ গ্রহণ কৰিছে ভাৰতীয় সেনাই৷ আজি সন্ধিয়া ৬ বজাত এখন সংবাদ মেলত এই বিষয়ে জানিবলৈ দিয়ে চীফ ডিফেঞ্চ ষ্টাফ জেনেৰেল বিপিন ৰাৱাটে৷ তেওঁ জনায় যে অহা দেওবাৰে অর্থাৎ ৩ মে’ত ভাৰতীয় স্থলবাহিনী, নৌবাহিনী আৰু বিমান বাহিনীৰ সহযোগত ক’ৰোনাৰ বিৰুদ্ধে যুঁজ দিয়া চিকিৎসক–নার্ছ–স্বা, আৰক্ষী আৰু জৰুৰী সেৱাত যুক্ত হৈ থকা ব্যক্তিসকলক সন্মান জনাব ৷
চীফ ডিফেঞ্চ ষ্টাফ বিপিন ৰাৱাটে জনোৱা মতে, বিমান বাহিনীৰ এটা শাখাই কাশ্মীৰৰ পৰা কন্যাকুমাৰীলৈকে আৰু অসমৰ ডিব্রুগড়ৰ পৰা কচ্চপর্যন্ত ফ্লাইপাষ্ট কৰিব৷ এই ফ্লাইপাষ্টত পৰিবহণ বিমানৰ লগতে যুদ্ধ বিমানেও অংশ ল’ব৷ আনহাতে, সশস্ত্র বাহিনীয়েও ক’ৰোনা যুদ্ধৰ যোদ্ধাসকলক সন্মান জনাব৷ চি ডি এছজনে জনোৱা মতে, সেনা বাহিনীয়ে দেশৰ প্রতিখন ক’ৰোনা হাস্পতালত মাউণ্টেইন বেণ্ড প্রদর্শন কৰিব৷ আৰক্ষী বাহিনীৰ সমর্থনৰ বাবে আৰক্ষীৰ স্মৃতিসৌধতো পুষ্পাঞ্জলি কৰিব৷ আনহাতে, নৌসেনা বাহিনীয়ে সমুদ্রৱর্তী এলেকাত যুদ্ধ জাহাজত লাইট জ্বলাই সন্মান জনাব ভাৰতৰ ক’ৰোনা যোদ্ধাসকলক৷ সংবাদ মেলত ভাৰতীয় সেনাৰ তিনিওটা বিভাগৰ মুৰব্বীসকল উপস্থিত আছিল৷