নিয়মীয়া বাৰ্তা, ২১ ফেব্ৰুৱাৰীঃ মৃত্যু পৰোৱানাৰ পৰা বাচিবলৈ নিত্য নতুন নাটক ৰচনা কৰিছে নির্ভয়া গণধর্ষণ আৰু হত্যা গোচৰৰ অন্যতম দোষী বিনয় কুমাৰ শর্মাই৷ তিহাৰ জে’লৰ কর্তৃপক্ষই জনোৱা মতে, যোৱা দেওবাৰৰ আবেলি বিনয় শর্মাই নিজেই কাৰাগাৰৰ দেৱালত মূৰ খুন্দিয়াই আঘাতপ্রাপ্ত হয়৷ তেওঁৰ আঘাত গুৰুতৰ নহয় আৰু জে’ল চৌহদতে চিকিৎসাৰ ব্যৱস্থা কৰা হৈছে৷
ইফালে, দিল্লীৰ আদালতে তিহাৰ জে’ল কর্তৃপক্ষক নির্দেশ দিছে বিনয় শর্মাৰ চিকিৎসাৰ ব্যৱস্থা কৰিবলৈ৷ উল্লেখ্য যে নির্ভয়া কাণ্ডৰ অভিযুক্ত বিনয় শর্মাৰ অধিবক্তাই তেওঁৰ মানসিক ৰোগ স্কিজোফ্রেনিয়া, মূৰ আৰু হাতত আঘাত পোৱা বুলি আবেদন দাখিল কৰি উন্নত চিকিৎসাৰ দাবী কৰিছিল৷ বিনয় শর্মাৰ অধিবক্তাই আদালতত জনোৱা মতে, শর্মাই তেওঁৰ মাতৃকে ধৰি আন সকলো ব্যক্তিক চিনাক্ত কৰিবলৈ অস্বীকাৰ কৰিছে৷ অধিবক্তাই ন্যায়ালয়ত জনোৱা আবেদনত আৰু উল্লেখ কৰিছে যে বিনয় শর্মাই গুৰুতৰভাৱে মূৰ আৰু হাতত আঘাত পাইছে আৰু তেওঁ অস্থিৰতা, মানসিক ৰোগ আৰু স্কিজোফ্রেনিয়াত আক্রান্ত হৈছে৷ যাৰ বাবে তেওঁ অধিবক্তা আৰু মাতৃকো চিনি পোৱা নাই৷