নিয়মীয়া বাৰ্তা, ২৪ এপ্ৰিল: কেইদিনমান পূর্বে অৰুণাচলৰ মন্ত্রী এগৰাকীয়ে প্রকাণ্ড ঢেঁকীয়াপতীয়া বাঘ এটাক শিকলিত ধৰি ফুৰাই লৈ থকা দেখিবলৈ পোৱা গৈছিল৷ এইবাৰ চিতাবাঘৰ পিঞ্জৰাত সোমাই বাঘৰ মূৰত হাত বুলোৱা দেখিবলৈ পোৱা গ’ল স্বল্পবসনা এগৰাকী তৰুণীক৷ অকল সেয়াই নহয়, পিঞ্জৰাৰ ভিতৰতে চিতাবাঘটোৰ সৈতে এই তৰুণীক ‘কেটৱাক’ কৰা দেখিবলৈও পোৱা গ’ল৷ শেহতীয়াকৈ তৰুণীৰ এই সাহসী ভিডিঅ’ ভাইৰেল হৈ পৰিছে ছ’চিয়েল মিডিয়াত৷ অৱশ্যে এই ভিডি’টো কোন স্থানৰ সেয়া জানিব পৰা হোৱা নাই৷ ভাৰতলৈ সুদীর্ঘ ৭০ বছৰৰ পিছত নামিবিয়া আৰু আফ্রিকাৰ পৰা চিতা পুনৰ অনা হৈছে৷ ভাৰতত চিতাৰ সৈতে এনেদৰে তৰুণীয়ে কেটৱাক কৰাৰ সুযোগ নাই৷ গতিকে নিঃসন্দেহে এই ভিডিঅ’টো ভাৰতৰ নহয়৷ সিধিকা শর্মা নামৰ মডেল এই তৰুণীয়ে চিতাৰ সৈতে ক’ত এনেদৰে ভিডিঅ’ প্রস্তুত কৰিছে সেয়া জানিব পৰা হোৱা নাই৷ কিন্তু ভিডিঅ’টোৱে ছ’চিয়েল মিডিয়া ব্যৱহাৰকাৰীসকলক শিহৰিত কৰিছে৷