নিয়মীয়া বার্তা, ২৪ এপ্রিলঃ ভাৰতত ক’ভিড–১৯ৰ বিৰুদ্ধে যুঁজত প্রধানমন্ত্রী নৰেন্দ্র মোদীয়ে গ্রহণ কৰা বলিষ্ঠ পদক্ষেপক ভূয়সী প্রশংসা কৰিছে বিলিয়নাৰ সমাজকর্মী বিল গেটছে৷ প্রধানমন্ত্রী মোদীলৈ লিখা এক পত্রত বিল গেটছে কয়, আপোনাৰ নেতৃত্বত দেশৰ চৰকাৰখনে ক’ভিড–১৯ৰ সংক্রমণৰ হাৰ নিয়ন্ত্রণত ৰাখিবলৈ সক্ষম হৈছে৷ আপোনাৰ নেতৃত্বৰ শলাগ লৈছোঁ৷ দেশত লকডাউন বলৱৎ কৰাৰ সমান্তৰালকৈ হটস্পটত আইছ’লেচন, কোৱাৰেণ্টাইন, সজাগতা আৰু স্বাস্থ্য সেৱা খণ্ডক শক্তিশালীকৰণৰ বাবে ব্যয় বৃদ্ধিৰ পদক্ষেপ গ্রহণ কৰিছে৷ তদুপৰি ডিজিটেল উদ্ভাৱনৰ জৰিয়তে আৰোগ্য সেতু এপ প্রচলন কৰি দেশৰ ক’ৰোনা ভাইৰাছক চিনাক্ত কৰা আৰু পৰীক্ষা কৰাৰ দৰে সহজ উপায় প্রয়োগ কৰিছে৷ যাৰ জৰিয়তে স্বাস্থ্য সেৱাত সকলো নাগৰিকক সংযুক্ত কৰিবলৈ সক্ষম হৈছে৷