নিয়মীয়া বাৰ্তা,২৫ জানুৱাৰীঃ নির্ভয়া ধর্ষণ গোচৰত দোষী সাব্যস্ত হোৱা চাৰি অপৰাধীক আগন্তুক ১ ফেব্রুৱাৰীৰ পুৱা ৬ বজাত তিহাৰ কাৰাগাৰত ফাঁচি দিয়াৰ সিদ্ধান্ত লোৱা হৈছে ৷ কাৰাগাৰ কর্তৃপক্ষই এই চাৰি অপৰাধীক ফাঁচি দিয়াৰ পূর্বে এবাৰ পৰিয়ালৰ সদস্যসকলক লগ কৰাৰ অনুমতি দিছে৷ অর্থাৎ এক ফেব্রুৱাৰীৰ পূর্বে মৃত্যুদণ্ডৰ ৰায় লাভ কৰা বিনয় শর্মা, অক্ষয় কুমাৰ সিং, মুকেশ কুমাৰ সিং আৰু পৱন গুপ্তাৰ পৰিয়ালে চাৰিওজনক কাৰাগাৰত লগ কৰিব পাৰিব৷ উল্লেখনীয় যে তিহাৰৰ ৩ নম্বৰ কাৰাগাৰৰ সুকীয়া সুকীয়া কুঠৰীত ৰখা হৈছে চাৰিওজন অপৰাধী৷ কালি তিহাৰ জে’ল কর্তৃপক্ষই এই জাননী জাৰি কৰিছে যদিও চাৰিওজন অপৰাধীয়ে নিজৰ পৰিয়ালৰ সৈতে মিলিত হোৱাৰ ক্ষেত্রত কোনোধৰণৰ ইচ্ছা প্রকাশ কৰা নাই৷ ফাঁচিৰ পূর্বে কেতিয়া পৰিয়ালৰ সৈতে মিলিত হ’ব তাক লৈ চাৰিওজনৰে কাৰাগাৰ কর্তৃপক্ষই মতামত বিচাৰিছিল যদিও কোনেও এই সন্দর্ভত নিজৰ ইচ্ছাৰ কথা ব্যক্ত কৰা নাই৷